535 total views
Tiniyak ng Diocese of Balanga ang pakikiisa ng Simbahan sa mga ahensya ng pamahalaan na mangangasiwa sa maayos, malinis at matapat na 2022 national and local elections.
Ayon kay Balanga Bishop Ruperto Santos, ito ay sa pamamagitan ng Diocesan Parish Pastoral Council for Responsible Voting upang maging katuwang ng Commission on Elections, Philippine National Police at ang Department of Education.
“We assured them of our cooperation and collaboration for a safe and peaceful, clean and honest, fair and free election. We offer our prayers, our participation for COMELEC re-orientation for electoral boards and assure them of our services,” bahagi ng pahayag ni Bishop Santos.
Noong Abril 13 nagpulong ang kinatawan ng mga ahensya kasama ang mga taga-diyosesis sa pangunguna ni Bishop Santos sa Casa del Obispo.
Tinalakay sa pulong ang mga hakbang na mapanatili ang maayos na halalan sa Mayo 9 gayundin ang mga paghahandang isinasagawa.
Kabilang sa mga dumalo sina Atty. Christine Garcia ng COMELEC; Col. Rommel Velasco ng PNP; Ramon Perez ng DepEd; Fr. Noel Nuguid, Fr. Anthony Sibug at Bro. Joel Danque (PPCRV priests and Lay directors).
Dalangin din ni Bishop Santos ang kaligtasan at katatagan ng mga mamamahala sa halalan at pinasalamatan ang kanilang pakikiisa sa mahalagang gawain sa buong bansa na magtatakda sa kinabukasan ng bayan.
“We appreciate their dedication and devotion to their calling; we commend their commitment and efficiency. We assured them of Holy Masses for their safety, strength and sound health,” dagdag ng Obispo.
Magsasagawa naman ng Novena Masses ang Diyosesis mula April 30 hanggang May 8 para ipanalangin ang mapayapang halalan sa May 9.
