1,777 total views
Muling nanawagan ng tulong ang Diyosesis ng Borongan para sa mga biktima ng pagbaha dulot patuloy na pag-uulang dala ng low pressure area sa Eastern Visayas Region.
Ayon kay Caritas Borongan/Diocesan Commission on Social Action Director Fr. James Abella, siyam na bayan sa Eastern Samar ang higit na apektado ng pagbaha.
Bilang tugon, binuksan ng diyosesis ang ilang mga parokya na hindi binaha upang pansamantalang evacuation centers ng nasa 5,738 pamilya o 21,330 indibidwal.
“Yung ginawa ng mga parokya, in-open ‘yung mga simbahan kasi mostly nasa mataas na part sila. Kaya ginawang evacuation centers ang mga simbahan pero ‘yung ibang parokya, lubog talaga sa baha kaya hindi kayang i-accomodate ‘yung ibang families,” pahayag ni Fr. Abella sa panayam ng Radio Veritas.
Nakikipag-ugnayan naman ang Caritas Borongan sa mga lokal na pamahalaan sa lalawigan upang matiyak na natutugunan ang pangangailangan ng mga pamilyang lubos na apektado ng pagbaha.
Hiling ng social arm ng Diyosesis ng Borongan ang tulong partikular na ang food packs, drinking water, at hygiene kit na malaki ang maitutulong sa mga biktimang pansamantalang nanunuluyan sa mga evacuation sites.
“Nananawagan ako sa publiko kasi ‘yung buong Eastern Samar ngayon ay nasa state of calamity. Naiintindihan namin yung mga hindi masyadong apektado na mas kailangang tulungan talaga ‘yung nasa Northern part ng Eastern Samar. Limited kasi ang resources namin kaya humihingi kami ng tulong sa mga tao kung mayroon silang ipapadala, either in-cash or in-kind,” saad ni Fr. Abella.
Sa mga nais magpadala ng tulong, bisitahin lamang ang facebook page ng Caritas Borongan, Inc. o kaya’y makipag-ugnayan kay Fr. James Abella sa numero bilang 0917-147-4435.
Nauna nang nanawagan ng tulong at panalangin si Borongan Bishop Crispin Varquez kasunod ng patuloy na epekto ng sakuna, gayundin ang pangako sa mga biktima na ibibigay ng simbahan at mga may mabubuting kalooban ang kanilang pangangailangan.
Read:
https://www.veritasph.net/diocese-of-borongan-nanawagan-ng-tulong/
