1,859 total reads
Palalakasin ng pribadong sektor ang disaster relief at preparedness katuwang ang pamahalaan upang ihanda at tugunan ang pangangailangan ng mga naapektuhan ng kalamidad.
Tiniyak ni Veron Gabaldon – Executive Director ng Philippine Disaster Resilience Foundation (PDRF) at ni Mayfourth Luneta – Executive Director ng Center for Disaster Preparedness – Philippines (CDP).
Inihayag ni Luneta na bago mangyari ang mga sakuna ay una ng nakikipag-ugnayan ang CDP-Philippines sa mga komunidad sa ibat-ibang bahagi ng bansa upang ihanda ang mamamayan.
“Nagbibigay kami ng mga pagsaanay doon hindi lang sa mga pamilya ganun din sa mga community level, meaning yung mga baranggay yung mga community ay nate-train namin na dapat mayroon silang community base early warning system kung kailan lilikas,saan yung mga designated evacuation.”pahayag ni Luneta sa Radio Veritas.
Tiniyak naman ni Gabaldon ng P-D-R-F ang pagsasagawa sa preparedness program kasama ang business sector upang matulungan ang mga negosyante na makapaghanda sa oras ng sakuna.
“Malaking bahagi ng paghahanda ay access to right information, tamang impormasyon sa tamang panahon at tamang oras. Malaking factor kasi hindi po natin maikakaila at maiwasan because of our geographical location talagang nandiyan yung bagyo, andiyan yung makakaranas tayo ng earthquake, volcanic eruption at ito pang mga health emergencies like this pandemic kaya all the more yung preparedness natin.” paglilinaw ni Gabaldon
Ang CDP-Philippines at P-D-R-F ay kasapi ng National Disaster Risk Reduction Management Council.
Tungkulin ng CDP-Philippines na ihanda at palawakin ang kaalaman ng mga komunidad hinggil sa paglikas at paghahanda sa mga kalamidad kabilang ang mental health program sa mga apektadong mamamayan.
Ang P-D-R-F ay kalipunan ng mahigit 100-miyembro mula sa private sector na tinutugunan ang pangangailangan ng mga negosyo higit na ng mga kabilang sa Micro Small and Medium Enterprise (MSME) Industry tuwing may kalamidad.
