587 total views
Kinundena ng Church People Workers Solidarity ang pagpapahintulot ng Department of Trade and Industry sa taas-presyo ng ilang pangunahing bilihin.
Nanindigan si Elmer Labog, co-chairperson ng CWS na hindi napapanahon ang price hike sa presyo ng mga pagkain na magdudulot ng dagdag-pasanin sa mga mahihirap.
Ipapatupad ang price hike sa gitna ng mataas na inflation rate noong nakaraang buwan ng Hulyo na umabot sa 6.4-porsiyento at unemployment rate na naitala sa higit 3-milyon noong buwan ng Hunyo.
“Mariin naming kinukundena ang panibagong pagpapahirap na ito sa ordinaryong mamamayan. Hindi na nga makaagapay talaga ‘yung kita ng mga manggagawa, malaki ang bilang ng unemployed, parang walang konsiderasyon ang panibagong patakaran na ito ng DTI,” pahayag ni Labog sa panayam ng Radio Veritas.
Nangangamba rin si Labog na lalong lalala ang kagutuman sa bansa dahil sa pagtataas ng presyo ng mga bilihin.
Iminungkahi naman ni Labog sa pamahalaan na bigyan ng financial aid ang mga mahihirap upang makasabay sa mataas na inflation.
Sinabi ng opisyal ng CWS na sa pamamagitan ng financial aid ay mapapalakas din ang sektor ng kalakalan dahil makakabili na ng kanilang pangangailangan ang mahihirap na mamamayan.
Bagamat wala pang petsa ang implementasyon ng price hike ay inihayag ni DTI Undersecretary Ruth Castelo na masusing pinag-aaralan ng Kagawaran ang 10-porsiyentong price hike sa presyo ng canned goods, instant noodles, instant coffee, gatas at asukal.
Nakasaad sa katuruang panlipunan ng Simbahang Katolika na laging isaalang–alang ang mga mahihirap sa anumang paggalaw ng presyo ng mga pangunahing bilihin at serbisyo.