10,069 total views
Hinimok ni Antipolo Bishop Ruperto Santos ang mananampalataya na maging tagapamagitan at tagapagtaguyod ng kapayapaan sa lipunan.
Iginiit ng obispo na ang karahasan sa pagitan ng Israel at Iran ay hindi lamang banta sa katatagan ng Middle East kundi sa kalagayang pangkapayapaan ng buong mundo.
Sinabi ni Bishop Santos bilang mga kristiyano ay tungkulin ng bawat isa na maging instrumento ng pagkakasundo at ipanalangin ang mga biktima ng karahasan sa iba’t ibang bahagi ng daigdig.
“The conflict between Iran and Israel is not just a political struggle—it is a human tragedy. As Christians, we are called to be peacemakers, to be aware of the suffering of others, and to intercede for those caught in the grip of war and violence,” pahayag ni Bishop Santos.
Batid ng obispo na pawang pagkasira ng pamayanan ang idinudulot ng mga digmaan kung saan kadalasang apektado ang mga inosenteng sibilyan.
“We cannot turn a blind eye to the pain of our brothers and sisters in the Middle East. Their suffering is our suffering, and their longing for peace must be our prayer,” giit ni Bishop Santos.
Sa ikaapat na araw ng digmaan sa pagitan ng dalawang bansa muling naglunsad ng pag-atake ang Israel laban sa Iran sa kabila ng panawagang de-escalation ng international communities.
Sa datos nasa 224 Iranian ang nasawi sa pag-atake ng Israel noong June 13 kabilang ang anim na matataas security chief ng bansa at mahigit sa 1, 400 katao ang nasugatan habang sa Israel nasa 13 katao na pawang sibilyan ang nasawi sa pagganti ng Iran.
Dahil dito hiniling ni Bishop Santos sa mananampalataya na magkaisang manalangin para sa kapayapaan at pag-asang umiral ang pagkakasundo ng mundo.
“As followers of Christ, we must stand firm in our commitment to peace, justice, and reconciliation. We must pray fervently, advocate for dialogue, and extend our compassion to those affected by war,” dagdag ni Bishop Santos.
Una nang hiniling ng Kanyang Kabanalan Leon XIV ang dayalogo sa pagitan ng mga magkatunggaling panig at magkasundong isulong ang pagbubuklod upang umiral ang kapayapaan sa lipunan.
