893 total reads
Matapos mag viral ang Chapel ng Philippine General Hospital nang magsilbi itong evacuation area ng mga sanggol na inilikas dahil sa naganap na sunog sa nasabing Ospital ay nagsisilbi naman ito ngayon para makatulong sa pangangailangan mga pasyente at empleyado.
Ayon kay Rev. Fr Marcilito Ocon SJ, chaplain ng UP-PGH, mas lumawak ngayon ang kanilang tinutulungan dahil sa naganap na insidente.
Batay sa bilang ay mayroong nasa humigit kumulang na 600 pasyente na kinabibilangan ng mga manggagawa, security at utility personnel ang kinakalinga sa 16 na ward ng Ospital.
Aminado si Fr. Ocon na marami sa mga pasyente ang walang madalang pagkain at dagdag pasanin sa kanila ang kawalan nito habang nananatili sa Ospital.
“Ang tinutulungan namin ngayon yun mga pasyente at health workers and then kasama yun mga nasa Covid areas at ward, yun mga Janitor at Security Guard sinama na namin sa pagtulong sa mga groceries… sa pasyente na admit na walang madalang pagkain galing sa bahay nila, madalas yun ang problema nila” Pahayag ni Fr. Ocon.
Samantala, kasalukuyan ay sinisikap na maibalik agad sa normal ang operasyon ng PGH bagamat may mga lugar pa na sumasailim sa clearing at pagkukumpuni.
“Medyo nag-stabilize na dahil unti-unti na bumalik sa normal pero yun iba kasi nililinisan pa… yun other areas hindi nasunog pero panay pa ang usok kaya kailangan nila i-clearing pa.”
Bukas naman ang Chapel ng UP-PGH para sa ano mang pagtulong na nais ibahagi ng ating mga kapanalig para sa mga pasyente at mga kawani ng pagamutan.
Sinabi ni Fr. Ocon na pangunahing pangangailangan pa din ngayon ang mga basic needs gaya ng pagkain at tubig maging mga gamit pambata gaya ng diaper at wipes.
Magugunitang bago pa man ang naganap na sunog ay aktibo na ang Chapel ng UP-PGH sa pagtulong sa mga mahihirap na naa-admit sa nasabing pagamutan. Madaling araw ng Ika-16 ng Mayo nang masunog ang ikatlong palapag ng UP-PGH kung saan umabot ito sa ikatlong alarma.
