8,609 total reads
Naglaan ng isang araw na Youth Conference ang Philippine Conference on New Evangelization (PCNE) bilang bahagi ng PCNE 2026 ngayong taon.
Gaganapin ang one-day Youth Conference sa Hulyo 26, 2026, na nakatuon sa mga kabataan kabilang ang mga estudyante, young professionals, youth ministers, at mga katekista.
Layunin ng programa na kilalanin at palalimin ang mahalagang papel ng kabataan bilang katuwang sa misyon ng bagong ebanghelisasyon ng Simbahan sa kasalukuyang panahon.
Inaasahan namang magsisilbing pagkakataon ang pagtitipon upang higit na mapalakas ang pastoral na pangangalaga at pakikilahok ng mga kabataan sa buhay ng Simbahan.
“This day is dedicated to the vibrant energy of: young people (students and young professionals), youth ministers & catechists focused on pastoral care for the young. Celebrating and deepening the importance of the youth as agents of the new evangelization.” Ayon sa Philippine Conference on New Evangelization (PCNE).
Nakatakda ang PCNE 2026 sa July 24 hanggang 26, 2026 sa University of Santo Tomas.
Bilang paghahanda sa nakatakdang PCNE 2026 ay binuksan na ng pamunuan ng Philippine Conference on New Evangelization (PCNE) ang registration period mula ngayong May 1 hanggang 15, 2026 para sa early bird registration habang magsisimula naman ang regular registration mula May 15, 2026 sa pamamagitan ng pakikipag-ugnayan sa tanggapan.
Pangunahing layunin ng Philippine Conference on New Evangelization (PCNE) na nagsimula noong 2013 sa pangunguna ni Filipino Cardinal Luis Antonio Tagle ang Pro Prefect ng Dicastery for Evangelization na noo’y ang arsobispo ng Arkidiyosesis ng Maynila na pag-isahin ang mga mananampalataya sa iisang misyon ng pagpapalaganap ng pag-ibig ni Kristo, sa pamamagitan ng muling pagpapalalim ng pananampalataya at paghahanda bilang mga saksi ng Ebanghelyo.
