334 total views
Kinilala ng Trade Union Congress of the Philippines (TUCP) ang isang-libong pisong umento sa buwanang suweldo ng mga kasambahay sa Metro Manila.
Ito ay matapos maaprubahan ng National Capital Region Regional Tripartite Wages and Productivity Board ang wage hike.
Ayon kay Alan Tanjusay – Spokesperson ng TUCP, malaking tulong sa mga kasambahay ang umento higit na sa kanilang mga pamilya bunsod ng patuloy na pag-taas ng presyo ng mga pangunahing bilihin.
“Halos lahat kasi ng mga kasambahay ay mga magulang o kapatid na mga breadwinner ng pamilya na tumutulong sa pang-araw araw na pangangailangan ng mga anak, mga kapatid o kaya naman ay mga magulang,” ayon sa mensaheng ipinadala ni Tanjusay sa Radio Veritas
Umaasa rin si Tanjusay na mababawasan ang pagkakataon ng pag-alis sa Pilipinas ng mga kasambay upang magtrabaho bilang Domestic Helper (DH) sa ibang bansa.
“Dahil din sa pagtaas ng sahod, madi-discourage ang ilang mga kasambahay na mag-trabaho abroad at magtrabaho bilang household service workers. Ayon kasi sa mga report, mga kasambahay ang pinakainabusong uri ng mga overseas Filipino workers at madalas nakararanas ng karumal-dumal na krimen,” ayon pa sa opisyal ng TUCP
Una naring Kinilala ng Ecumenical Institute for Labor Education and Research (EILER) at Federation of Free Workers (FFW) ang pagpapatupad ng mga wage hike na aabot sa 30 hanggang 110-piso ng Regional Tripartite Wages and Productivity Board.
Ayon sa mga labor groups, bagamat mababa ay maari itong makatulong upang makabili ang mga manggagawa at kanilang pamilya ng mga pangangailangan at makapamuhay ng may dignidad.