757 total reads
Ibinahagi ng Conference of Major Superiors in the Philippines ang isasagawang ikalawang national convention sa September 1 hanggang 5 sa Zamboanga City.
Ayon sa CMSP, tampok sa pagtitipon ngayong taon ang pakikibahagi ni Sister Simona Brambilla, M.C., ang kasalukuyang Prefect ng Vatican’s Dicastery for Institutes of Consecrated Life and Societies of Apostolic Life.
Pangungunahan ng opisyal ng Vatican ang virtual keynote address sa pagbubukas ng convention, kung saan ang tema ngayong taon ay “Consecrated Persons: Prophetic Witnesses of Peace in a Wounded World.”
Tatalakayin sa pagtitipon ng mga lider ng iba’t ibang religious congregation at apostolic life sa bansa ang mga hamong kinakaharap ng Simbahan at ng lipunan, at pagnilayan kung paano mapalalakas ng mga consecrated persons ang kanilang misyon para sa kapayapaan.
“Participants will seek to discern, in a spirit of communion and synodality, how consecrated persons may renew and strengthen their prophetic witness and contribute, both individually and collectively, to the promotion of peace, reconciliation, and the common good, particularly in the Philippine context,” ayon sa CMSP.
Binigyang-diin ng grupo na pagkakataon din ito upang paigtingin ang fraternal encounter at sama-samang pagninilay ng mga relihiyoso, relihiyosa at consecrated persons para sa mga kasalukuyang hamon ng simbahan.
Ang CMSP ay naitatag sa pamamagitan ng decree ng Holy See noong August 26, 2025 at isang permanent association of pontifical right na binubuo ng mga major at highest superiors’ ng mga institusyon ng consecrated life at societies of apostolic life sa Pilipinas.
Patuloy na isinusulong ng samahan ang malalim na pagkakaisa, ugnayan, pagtutulungan, at suporta sa hanay ng mga consecrated persons, gayundin ang pagtugon sa mga pastoral at panlipunang realidad sa bansa.
