5,790 total views
Isa sa mga mahahalagang isyu ng bansa ay ang polusyon sa hangin sa mga urban areas ng ating bansa. Dito sa Metro Manila, maraming mga araw na pag-gising natin, sa halip na bughaw na kalangitan ang bumungad sa ating mga mata, puro smog o haze na ang ating nakikita.
Malaki ang epekto ng air pollution sa ating quality of life, mga kapanalig. Sa tagal ng panahon na kasama na natin ito, tila nasanay na ang maraming mga Filipino. Sa katunayan, hindi na lang sa Metro Manila matingkad ang air pollution, maraming mga urban areas sa ating bayan ay nagiging marumi na rin rin ang hangin. Huwag tayong masanay dito o makampante. Kailangan natin itong labanan. Ngayong 2022, may mga pagsasaliksik na nagsasabi na ang konsentrasyon ng PM2.5 o maliit na particulate matter sa atin bayan ay mas mataas ng tatlong beses sa tinakdang guidelines ng World Health Organization (WHO).
Kawawa ang kalusugan ng ating bansa dahil sa problemang ito, kapanalig. Alam nyo ba na 32% ng mga kamatayang mula sa stroke at ischaemic heart disease ay dulot ng air pollution? Ang polusyon ay malaki rin ang epekto sa ating mga kababayan na may mga hika at allergies. Kapag sobra, maaaring life threatening din ito. Sabi nga mismo ni Pope Francis sa Laudato Si, bahagi ng Panlipunang Turo ng Simbahan: Some forms of pollution are part of people’s daily experience. Exposure to atmospheric pollutants produces a broad spectrum of health hazards, especially for the poor, and causes millions of premature deaths.
Kaya lamang, kapanalig, napakahirap para sa mga bansang gaya natin na bigyan ng mabilisang solusyon ang dumi ng ating hangin. Ang air pollution kasi kapanalig ay dulot din naman ng mga human activities na nagdadala ng convenience at kaunlaran sa bayan – gaya ng transport, industry, at manufacturing. Meron kayang paraan upang mabawasan ang mga polusyon mula sa mga human activities na ito para maging sustainable naman sila at pro-people and environment?
Isa dito, kapanalig ay ang pagpapa-igting ng air quality monitoring sa bansa. Gaya ng pagfo-forecast ng weather, sana mayroon ding tayong air pollution forecast system na magmomonitor ng mga pollutants sa hangin at magpapa-alam sa mga Filipino sa araw araw kung gaano na kadumi ang hangin, at kung saan nanggagaling ang dumi na ito. Sa pamamagitan ng pagmomonitor, tataas ang awareness ukol sa importansya nito at matutulungan ang pamahalaan na palakasin ang ngipin ng Clean Air Act. Kapag alam ng mas maraming Filipino kung saan nanggagaling ang dumi, magiging mas malakas ang accountability sa lipunan.
Dapat sabayan ang air quality monitoring ng iba-ibang pag-gamit ng teknolohiya para mabawasan ang polusyon from the source – kung saan nanggagaling. Halimbawa, sa ating bayan, malaking porsyento ng air pollution ay mula sa transport sector. Maari nating isulong ang pag-gamit ng efficient fuel at fuel systems upang bawas ang polusyon. Maaari ding isulong ang paggamit ng mga bikes sa lungsod at gawing mas walkable ito. Marami tayong magagawa, kailangan lamang ay makita ng lipunan ang importansya ng malinis na hangin. Kailangan nating agarang gawin ang mga ito, bago maging huli ang lahat.
Sumainyo ang Katotohanan.
