3,531 total views
Hinimok ng EcoWaste Coalition ang mamamayan na pagnilayang mabuti ang pagpili sa mga kakandidato sa nalalapit na Barangay at Sangguniang Kabataan Elections sa bansa.
Ayon kay EcoWaste Zero Waste Campaigner Ochie Tolentino, mahalagang matiyak ng publiko na ang susuportahan at ihahalal na kandidato ay mayroong tapat na pusong maglingkod sa mamamayan at mangangalaga sa kapaligiran.
Sinabi ni Tolentino na kasabay ng lumalalang krisis sa kapaligiran dulot ng climate change, polusyon, at pagkaubos ng mga likas na yaman, makatutulong na mapabilang sa plataporma ng mga kandidato ang pangangalaga sa kalikasan tulad ng pagtugon sa matagal nang suliranin sa plastic at basura.
“Candidates, in their strong drive to win, usually forget that they have a responsibility to ensure that campaign activities do not lead to the further degradation of our environment. We therefore ask all candidates, as well as their supporters, to be respectful of the environment and avoid practices that squander resources, generate trash and bring about pollution that can endanger the health and well-being of their constituents,” pahayag ni Tolentino.
Ginawa ng grupo ang panawagan sa labas ng tanggapan ng Commission on Elections (COMELEC) sa Intramuros, Maynila nitong Oktubre 17.
Binigyang diin ng EcoWaste ang mensaheng “Panalo ang bayan at kalikasan sa halalang walang basura” at “Vote for Mother Earth” bilang pagpapahayag ng pagnanais na magkaroon ng malinis at mapayapang eleksyon at kapaligiran.
Hinimok din ng grupo ang mga kandidato na sa pangangampanya ay gamitin lamang ang recyclable at non-toxic materials; isulong ang pag-iwas ang paggamit ng plastic; at sumunod sa wastong pagtatapon ng basura lalo na sa mga pagtitipon.
“The eco-friendly conduct of the synchronized elections for barangay and youth leaders will surely yield tangible benefits for Mother Earth, especially if resources are judiciously used and environmental pollution is avoided, among others,” ayon kay Tolentino.
Muli namang pinaalalahanan ng simbahan ang 67-milyong botante sa bansa sa matalinong paghalal sa mga susunod na lider alinsunod sa katangiang matapat, makatarungan at handang itaguyod ang kabutihan ng bawat mamamayan.
