15,474 total views
Nagluksa ang Sangguniang Laiko ng Pilipinas sa biglaang pagpanaw ni Tarlac Bishop Enrique Macaraeg nitong October 23.
Kinilala ng grupo ang pagiging mabuting pastol ng obispo na kasalukuyang chairperson ng Episcopal Commission on the Laity ng Catholic Bishops Conference of the Philippines kung saan nagsisilbing implementing arm ang SLP.
Batid nito ang pagiging payak ni Bishop Macaraeg at masigasig na paggabay sa mga layko tungo sa landas ng Panginoong Hesukristo.
“His personal stories and sincere affection towards ordinary people have given us a testimony of the love of Christ in his life,” pahayag ng SLP.
Pumanaw si Bishop Macaraeg sa edad na 67 taong gulang dahil sa atake sa puso habang lumahok sa basketball tournament sa Malasiqui Pangasinan.
Tinuran ng mga layko na ipagpatuloy ang mga mabubuting halimbawang ipinamalas ni Bishop Macaraeg sa kanyang paninilbihang pinuno ng komisyong nangangalaga sa kawan ng Panginoon.
Anila nawa’y sa mga panalangin ng namayapang obispo ay higit na maunawaan ng mga layko ang malaking gampanin sa pag-unlad ng simbahang katolika lalo’t ito ang bumubuo sa 99 porsyentong populasyon ng mananampalataya.
“May his prayers for us as our Bishop-friend lead us to appreciate more our own purposes and discipleship, as he will continue to journey with us,” saad ng grupo.
Sa nalalapit na 23rd National Biennial Convention ng mga layko na isasagawa sa Tacloban City sa October 27 hanggang 29 ay iaalay ng SLP ang mga panalangin sa kapayapaan ng paglalakbay ni Bishop Macaraeg tungo sa buhay na walang hanggan.
Si Bishop Macaraeg ay inordinahang pari noong May 19, 1979 sa Archdiocese of Lingayen-Dagupan habang itinalagang ikatlong obispo ng Tarlac noong March 2016.
Ginawaran ng episcopal ordination noong May 24 at pormal na iniluklok May 31, 2016.
