22,799 total views
Ikinagalak ng Diocese of Antipolo na ibahagi sa kristiyanong pamayanan ang biyaya ng pananampalatayang patuloy tinatamasa ng diyosesis.
Ito ang mensahe ni Bishop Ruperto Santos makaraang aprubahan ng Santo Papa Francisco nitong February 14 ang canonical coronation sa imahe ng Nuestra Señora de Fatima na nakadambana sa Diocesan Shrine and Parish Church of Saint Paul of the Cross sa Marikina City.
“It is with grateful hearts that we, in the Diocese, share and offer this tremendous blessing after blessing to all of you,” mensahe ni Bishop Santos.
Pinasalamatan din ng obispo ang santo papa sa malaking biyayang ipnagkaloob sa pamayanan ng mahigit tatlong milyong katoliko ng buong lalawigan ng Rizal at Marikina City na makatutulong sa pagpapayabong ng debosyon at pananampalataya.
“This enormous and symbolic gift, will surely deepen our devotion to the Mother of our Lord Jesus, who is also our mother,” ani Bishop Santos.
Kinilala rin ng obispo ang dedikasyon ng mga layko at lingkod ng simbahan ng Diocesan Shrine and Parish Church of Saint Paul of the Cross sa pangunguna ni Father Vicentico Flores, Jr. na nagtulong-tulong upang maisumite ang mga kinakailangang dokumento para sa canonical coronation.
Ito na ang ikalawang imahe ng Markina City na binigyang pagkilala ng santo papa at ikaanim sa buong diyosesis kabilang na ang Nuestra Señora Dela Paz y Buenviaje sa International Shrine of Our Lady of Peace and Good Voyage sa Antipolo; Nuestra Señora de los Desamparados ng Diocesan Shrine of Our Lady of the Abandoned sa Marikina; Nuestra Señora de Aranzazu ng Diocesan Shrine – Parish of Nuestra Señora de Aranzazu sa San Mateo, Rizal; Nuestra Señora de la Lumen ng Diocesan Shrine and Parish of Our Lady of Light sa Cainta; at ang Nuestra Señora del Santísimo Rosario ng Diocesan Shrine of Our Lady of the Holy Rosary sa Cardona.
Kamakailan ay pormal na itinalaga ang Antipolo Cathedral bilang International Shrine of Our Lady of Peace and Good Voyage gayundin ang pagtalaga sa ika – 23 Minor Basilica ng bansa ang Minor Basilica of the Parish Church of Saint John the Baptist sa Taytay Rizal.
Inaanyayahan ni Bishop Santos ang mananampalataya sa rito ng canonical coronation sa May 12, 2024, sa alas nuwebe ng umaga isang araw bago ang kapistahan ng Our Lady of Fatima sa May 13.
