14,309 total reads
Nakikiisa si Hollywood actor at environmental activist Leonardo DiCaprio sa panawagang pangalagaan ang Masungi Geopark Project laban sa mga mapaminsalang pag-unlad na nakakaapekto sa itinuturing na protected area.
Sa instagram post, hinikayat ni DiCaprio si Pangulong Ferdinand Marcos, Jr. na kumilos upang mapaigting at maipagpatuloy ang hangaring mapangalagaan Masungi Geopark laban sa mga pinsalang dulot ng tao.
“Join local rangers in calling on President [Ferdinand “Bongbong” Marcos, Jr.] to intervene and continue to protect Masungi. Conservation successes like Masungi serve as a reminder that the Philippines can become a leader in sustainability, eco-tourism, biodiversity protection, and climate action,” ayon kay DiCaprio.
Nababahala ang aktor dahil ang tagumpay na nasimulan upang mapangalagaan ang Masungi Geopark ay nanganganib dahil sa banta ng Department of Environment and Natural Resources na bawiin ang kasunduan na nagbibigay proteksyon laban sa mga nangangamkam ng lupa.
Matatagpuan sa lalawigan ng Rizal, ang Masungi Geopark Project na may lawak na 2,700 ektarya ay isang award-winning conservation initiative na naglalayong ibalik ang isang mahalagang bahagi ng Upper Marikina Watershed.
Gayunman, nanganganib ito dahil sa pahayag ni Environment Secretary Toni Yulo-Loyzaga na binabalak kanselahin ang 2017 Memorandum of Agreement sa pagitan ng Masungi Georeserve Foundation at ng DENR.
“This cancellation would set back the success of an internationally acclaimed conservation effort and leave the area vulnerable again to mining, logging, and illegal developments,” saad ni DiCaprio.
Pinarangalan ang Masungi Georeserve sa 2024 World Economic Forum sa Davos, Switzerland, at iginawad din ang 2022 United Nations Sustainable Development Goals Action Campaign Inspire Awards dahil sa natatanging pangangalaga at pagpapanumbalik ng kalikasan.
Una nang nagpahayag ng suporta ang Caritas Philippines sa Masungi Georeserve Foundation, at nanawagan sa pamahalaan na magkaroon ng maayos na pakikipag-diyalogo para baguhin ang desisyon sa pagbawi sa kasunduan.
