13,914 total reads
Inaanyayahan ng Conference of Major Superiors in the Philippines (CMSP) ang mananampalataya na makiisa sa pagdiriwang ngayong taon ng World Day of Consecrated Life.
Ayon kay CMSP Co – Executive Secretary Fr. Angel Cortez, OFM mahalagang tungkulin ang ginagampanan ng mga layko sa simbahan lalo na sa larangan ng pagmimisyon tulad ng mga halimbawa ng consecrated persons.
“Iba – iba ang pagtugon ng mga layko pero napakalaki ng ambag nila sa mga gawaing pagmimisyon sa simbahan bilang katuwang ng mga pari at madre kaya nag-aanayaya ako sa ating mga Kapanalig na gustong makita yung pagkakaiba at kakayahan ng mga kongregasyon at mga layko na tumugon sa panawagan ng pagmimisyon sa pamamagitan ng pagtalaga ng kanilang buhay sa pagtitipong gagawain ngayong February 2,” pahayag ni Fr. Cortez sa panayam ng Radio Veritas.
Pagninilayang tema ngayong taon ang ‘Consecrated Persons as Pilgrims of Hope’ hango sa pagdiriwang ng Jubilee Year of Hope’ ngayong 2025.
Isasagawa ang pagtitipon sa February 2 mula alas otso ng umaga sa Siena College sa Quezon City kung saan tampok sa pagdiriwang ang mga panayam ng iba’t ibang kinatawan ng mga kongregasyon.
Ilan sa magbibigay ng mensahe si Sr. Cecilia Espenilla, OP ang kasalukuyang Co-Chairperson ng CMSP, Cubao Bishop Emeritus Honesto Ongtioco ang chairperson ng Episcopal Commission on Mutual Relations Between Bishops and Religious ng Catholic Bishops’ Conference of the Philippines.
Magbabahagi naman ng mga karanasan sa foreign missions ang mga consecrated persons na sina Fr. Hirohito Bolo, CICM ang Provincial Superior ng Congregation of the Immaculate Heart of Mary; Br. Edmundo Fernandez, FSC, Pangulo ng De La Salle Greenhills; Sr. Maria Paule, AMP ang Superior General ng Augustinian Missionaries of the Philippines.
Para naman sa testimonial sharing mula sa Older Consecrated Person si Sr. Sonia Aldeguer, RSCJ, kasapi ng Society of the Sacred Heart; mula sa Secular Institutes si Frederick Perez ng Sons of Notre Dame de Vie, pangulo ng Asian Conference of Secular Institute; habang sa Formandi naman si Sr. Rhea Fatima Novarro, RA kasapi ng Exodus.
Pangungunahan ni Claretian Bishop Elias Ayuban, Jr. ng Diocese of Cubao ang pagdiriwang ng Banal na Misa sa alas 10 ng umaga habang si CMSP Co – Chairperson Franciscan Fr. Lino Gregorio Redoblado naman ang magbahagi ng kanyang closing message sa pagdiriwang ngayong taon.
Ito na ang ika – 29 na World Day of Consecrated Life na pinasimulan noong 1997 ni noo’y Santo Papa, St. John Paul II kasabay ng pagdiriwang ng Presentation of the Lord o Candlemas Day.
Sa mga nais makibahagi bisitahin lamang ang official Facebook Page ng CMSP para sa karagdagang detalye.(
