5,481 total views
Kinasasabikan ng mga paring Pilipino sa Roma ang kanilang unang personal na pagkikita kay Pope Leo XIV, ang ika-267 na Santo Papa ng simbahan, sa darating na Hunyo 12.
Ayon kay Fr. Greg Gaston, rector ng Pontificio Collegio Filippino, isang espesyal na “audience” ang inihanda kung saan makakaharap mismo ng mga pari si Pope Leo sa Vatican.
“Kami medyo excited na rin. Excited na excited. Hindi lang medyo sapagkat magkakaroon na kami ng audience. Mamimeet na rin namin ang Santo Papa, si Pope Leo bilang mga pari na naka-assign sa Roma,” ani Fr. Gaston.
Aabot sa 51 Pilipinong pari at 5 dayuhang pari na kasalukuyang naninirahan sa Collegio ang inaasahang dadalo sa naturang pagtitipon.
Ang Pontificio Collegio Filippino ay isang institusyong matatagpuan sa Roma kung saan naninirahan at nagsasanay ang mga piling mga pari mula sa Pilipinas upang mag-aral ng mas mataas na kurso tungkol sa simbahan, tulad ng teolohiya, at batas ng simbahan.
“Yung ating 51 Filipino priests, yung ating 5 non-Filipino priests na kasama sa Collegio Filipino ay mamimeet yung ating Santo Papa itong June 12.”
Kamakailan lamang naihalal si Pope Leo bilang bagong pinuno ng Simbahang Katolika. Pagkatapos ng kanyang eleksyon, agad siyang nagsimula sa kanyang gawain bilang Santo Papa—kabilang na ang pakikipagpulong sa media at iba’t ibang grupo sa Vatican.
Ang pagkikitang ito ay hindi lang simpleng pagbisita. Isa rin itong mahalagang sandali para sa mga paring Pilipino na matagal nang nagsisikap sa kanilang pag-aaral at misyon sa Roma
Ang audience kay Pope Leo ay inaasahang magpapatibay sa kanilang pananampalataya at magbibigay-lakas sa kanilang layunin bilang mga pari—hindi lang sa Roma, kundi sa kanilang pagbabalik sa Pilipinas.
