37,444 total views
Nanindigan ang Office on Stewardship ng Catholic Bishops’Conference of the Philippines na walang mabuting idudulot ang digmaan sa lipunan kundi pagkawasak at pagkakahati-hati.
Ito ang binigyang diin ni Taytay Palawan Bishop Broderick Pabillo sa patuloy na karahasan sa pagitan ng Israel at Iran.
Ayon sa obispo dapat hindi balewalain ng mga Pilipino ang mga nangyayaring karahasan sapagkat apektado nito ang buong mundo.
“Huwag po nating balewalain ang mga pangyayari sa kadahilanang malayo naman tayo. Sa kalagayan ng mundo ngayon, anuman at saanmang digmaan ay nakakaapekto sa lahat. Nakakaapekto ito sa ekonomiya ng mga bansa. Sa anumang digmaan, lahat ay talo,” bahagi ng liham pastoral ni Bishop Pabillo.
Tinuran ng opisyal na ang lubhang apektado ng digmaan ang mga bulnerableng sektor tulad ng mga bata, matatanda, kababaihan at ang mga may kapansanan.
Iginiit din ni Bishop Pabilo na bukod sa karahasan at kamatayang dulot ng digmaan ay lumalaganap din ang kasinungalingan lalo na sa mga makapangyarihang indibidwal na isinusulong ang sariling interes gamit ang armas.
Apela ng opisyal sa pamahalaan na tutulan ang anumang digmaan at iwasan ang anumang paraan ng paggamit ng sandata sa halip ay magbuklod sa panalangin tungo sa kapayapaan.
“Huwag tayong magsawang manawagan ng kapayapaan. Isang malaking magagawa natin kahit malayo tayo sa labanan ay magdasal. Kaya hinihikayat ko ang lahat na magdasal ng Santo Rosaryo sa ating mga tahanan, sa ating mga Kriska, sa ating mga chapels at mga simbahan,” dagdag ni Bishop Pabillo.
Pinaalalahanan ng obispo ang mananampalataya sa panawagan ng Mahal na Birheng Maria nang magpakita ito sa tatlong bata sa Fatima Portugal na ipanalangin ang pagpanibago ng puso ng bawat isa upang magkaroon ng kapayapaan sa buong mundo.
Bukod sa digmaan sa pagitan ng Ukraine at Russia na kumitil ng libo-libong indibidwal nagpapatuloy din ang sagupaan sa Gaza at Lebanon habang kamakailan ay sumiklab naman ang digmaan sa pagitan ng Israel at Iran.
Nangangamba si Bishop Pabillo sa kalagayan ng mga Overseas Filipino Workers sa mga apektadong bansa na batay sa datos ng Department of Foreign Affairs tinatayang nasa 30-libong OFWs ang nasa Israel habang nasa dalawang libo naman ang nasa Iran.
Sa pahayag ni Philippine Ambassador to Israel Aileen Mendiola walong Pilipino na ang nasugatan sa digmaan ng dalawang bansa kung saan isa rito ang nasa kritikal na kondisyon.
Umaasa si Bishop Pabillo na sa pamamagitan ng mga panalangin ay lumambot ang puso ng mga lider ng magkatunggaling bansa at magkasundong isulong ang dayalogo para sa pagbubuklod ng mamamayan at iiral ang kapayapaan sa mundo.
