24,844 total views
Hinimok ng Kanyang Kabunyian Manila Archbishop Jose Cardinal Advincula ang mga kawani ng Roman Catholic Archdiocese of Manila o RCAM Curia na patuloy makilakbay sa kristiyanong pamayanan bilang pakikiisa sa misyon.
Ito ang mensahe ng arsobispo sa ginanap na Jubilee of the RCAM Curia nitong June 26 sa Minor Basilica and Metropolitan Cathedral of the Immaculate Conception o Manila Cathedral.
Ayon sa cardinal bilang kawani ng simbahan ay mahalagang maglingkod sa kapwa lalo na sa nag-iisa at may pinagdadaanan. Binigyang din ni Cardinal Advincula na bukod sa araw-araw na pagpapagal at pagganap ng mahusay sa mga gawain ay dapat ding nakahanda ang mga kawani sa pagbibigay ng sarili para sa simbahan.
“Hinikayat ang lahat na magbahagi ng sarili sa buhay ng simbahan anuman ang taglay nating kakayahan o katangian, maging daan nawa tayo upang mas lumaganap pa ang pakikibahagi ng lahat sa ating buhay bilang simbahan,” ayon kay Cardinal Advincula. Hamon ng cardinal sa RCAM Curia na isabuhay ang simbahang sinodal na sama-samang naglalakbay sa pamamagitan ng pagsabuhay sa temang ‘communion, participation and mission’.
Pinuri ni Cardinal Advincula ang mga programa ng curia tulad ng taunang pagpapabinyag ng mga bata ng Baseco Tondo at iba pang outreach program lalo na sa mga komunidad na labis nangangailangan ng pagkalinga.
Iginiit ng arsobispo na hindi eksklusibong grupo ang mga kawani ng simbahan sa halip ay kabahagi sa misyon ni Hesus upang maabot ang bawat nasasakupan at mapakinggan ang kanilang pangangailangan.
“Maging instrumento nawa tayo upang mapakinggan at mauwanaan ang mga karanasan at saloobin ng ating kapwa, sikapin nating maipakilala si Hesus sa kanila at maging daan upang mas mapamahal sila kay Hesus,” giit ni Cardinal Advincula.
Bahagi ng Jubilee of the RCAM Curia ang ‘Walk of Hope’ mula sa Arzobispado patungong Manila Cathedral kung saan nagbigay ng panayam si Msgr. Reginald Malicdem ang kasalukuyang Vicar General at Moderator Curiae ng arkidiyosesis.
Nagkaroon din ng concurrent sessions na nakatuon sa mga paksang ‘Workplace Dynamics, Mental Health, at Financial Literacy’ para sa lahat ng kawani. Bilang pasasalamat at pagkilala ni Cardinal Advincula sa mga kawani na kanyang katuwang sa paglilingkod sa arkidiyosesis ay ang pagdadagdag ng sahod at ilang benepisyo nito makalipas ang isinagawang pag-aaral at restructuring ng RCAM Curia.
