46,281 total reads
Nagpaabot ng pagbati ang Diocese of Imus, Cavite sa pagkakahirang ng Catholic Bishops’ Conference of the Philippines (CBCP) kay Bishop Reynaldo Evangelista bilang bagong chairman ng CBCP–Episcopal Commission on Healthcare (ECHC).
Hahalili si Bishop Evangelista kay Naval, Biliran Bishop Rex Ramirez, na nagsilbing pinuno ng komisyon mula 2019 sa loob ng anim na taon, kabilang na sa kasagsagan ng COVID-19 pandemic.
Inanunsyo ang bagong tungkulin ng obispo sa katatapos lamang na 130th CBCP Plenary Assembly na ginanap sa Anda, Bohol.
“Mula sa sambayanang Kabitenyo, isang taus-pusong pagbati ang ipinapaabot natin sa ating minamahal na Obispo, Lubhang Kagalang-galang Reynaldo G. Evangelista, D.D., sa kanyang bagong tungkulin bilang Chairman ng CBCP-Episcopal Commission on Health Care,” pagbati ng diyosesis.
Bago ito, nagsilbi si Bishop Evangelista bilang chairman ng CBCP–Episcopal Commission on Public Affairs mula 2019 hanggang 2023.
Samantala, nagpahayag din ng pagbati ang mga kawani at tagapaglingkod ng CBCP–ECHC kay Bishop Evangelista, gayundin ang pasasalamat kay Bishop Ramirez sa kanyang tapat na paglilingkod sa komisyon, lalo na sa panahon ng krisis sa kalusugan dulot ng pandemya.
Magtatapos ang termino ni Bishop Ramirez sa November 30, 2025, habang si Bishop Evangelista naman ay opisyal na magsisimula sa December 1, 2025.
