34,706 total reads
Bukod sa mga talakayan at pagninilay, tampok sa 11th Philippine Conference on New Evangelization (PCNE XI) ang Sacred Heart of Jesus exhibit ng National Shrine of the Sacred Heart sa University of Santo Tomas Quadricentennial Pavilion.
Ayon kay Sacred Heart Shrine Ministry of the Word assistant coordinator, Sis. Marilou Prudente, layunin ng exhibit na maipakita at maibahagi ang kasaysayan, mga panalangin, at mga patotoo kaugnay sa debosyon sa Kamahal-mahalang Puso ni Hesus, kabilang ang first-class relics nina St. Mary Margaret Alacoque at St. Claude de la Colombiere.
“We would like to invite everyone to see the exhibit of the National Shrine of the Sacred Heart. In the exhibit, you will see the history of the National Shrine of the Sacred Heart. You will also get to know better the devotion, the history regarding the Sacred Heart. We would love to have you here. Please do come,” ayon kay Prudente.
Pormal na sinimulan, kahapon, ang unang araw ng PCNE XI sa pamamagitan ng pagdadambana ng imahen ng Kamahal-mahalang Puso ni Hesus, sa pangunguna ni Sacred Heart Shrine team ministry member at Radyo Veritas President Fr. Roy Bellen.
Bahagi ito ng paggunita sa ika-350 anibersaryo ng Sacred Heart apparitions kay St. Margaret na naitala mula 1673 hanggang 1675.
Pinalalim ng mga aparisyon ang pag-unawa sa pag-ibig at habag ni Kristo para sa sangkatauhan, at nagbigay-inspirasyon sa malawakang debosyon sa Banal na Puso na sumasagisag sa Kanyang wagas na pag-ibig at walang hanggang awa.
Dahil dito, lumaganap sa Simbahang Katolika ang First Friday at Holy Hour devotions bilang tugon sa paanyaya ni Hesus para sa pag-ibig at pagbabayad-sala.
Noong October 24, 2024, inilabas ng namayapang Papa Francisco ang ensiklikal na Dilexit Nos, na muling nananawagan sa debosyon sa Kamahal-mahalang puso ni Hesus sa mundong puno ng tunggalian at kawalang malasakit.
Magtatagal ang exhibit hanggang bukas, July 20, kasabay ng pagtatapos ng PCNE XI.
