47,041 total reads
Nanatiling matatag sa pananampalataya si Maria Teresa Batistis sa kabila ng pagkamatay ng kanyang panganay na anak na si Fhilton John Batistis matapos malunod sa baha dulot ng hanging Habagat na pinaigting ng bagyong Crising.
Sa panayam ng Radyo Veritas, sinabi ni Batistis na sa kabila ng sinapit ng kanilang pamilya ay buo pa rin ang kanyang tiwala sa Diyos.
“Lahat ng mga pagsubok na binigay sa akin, tinanggap ko naman ng maluwag sa puso ko. Sa Panginoon ako humuhugot ng pag-asa. Hinihiling ko sa Kanya na bigyan kaming mag-asawa ng lakas ng loob para sa dalawa pa naming anak,” pahayag ni Batistis.
Pagbabahagi nito umalis si Fhilton sa kanilang tahanan noong July 21 at inabutan ng biglaang pagtaas ng tubig sa ‘Calvary’ area ng Damayang Lagi, Quezon City at hindi agad natagpuan matapos tangayin ng baha.
Dahil sa hirap ng paghahanap, dumulog si Batistis sa panalangin sa paanan ng Our Lady of Mount Carmel upang humiling ng tulong na matagpuan ang katawan ng kanyang anak.
Makalipas ang 24 oras, natagpuan ang labi ni Fhilton sa dalampasigan ng Navotas City.
Lubos ang pasasalamat ng mag-asawang Edwin at Maria Teresa Batistis sa mga indibidwal at institusyong tumulong sa kanilang pamilya.
“Kahit sabihing masama ang nangyari sa aming pamilya, ipinagpapasalamat ko pa rin sa Diyos. Dito ko nakikita ang mga taong nagmamahal sa amin, sa anak ko. Hindi kami pinababayaan—tinutulungan kami,” dagdag ni Batistis.
Personal namang nakiramay si Cubao Bishop Elias Ayuban Jr., CMF sa pamilya Batistis, na pansamantalang lumikas sa Minor Basilica of the National Shrine of Our Lady of Mount Carmel.
“Tayo ay isang pamilya. Kaya kung meron man sa ating mga kapatid na nangangailangan ng tulong, tayo ay handang makiisa, makiramay, at magbigay ng anumang pwedeng maiambag para lang maibsan ang ating kahirapan,” pahayag ng Obispo sa Radyo Veritas.
Si Fhilton, isang iskolar ng basilica, ay kabilang sa pitong nasawi sa pananalasa ng habagat, ayon sa ulat ng National Disaster Risk Reduction and Management Council (NDRRMC) bukod pa rito ang walo na nawawala habang pito naman ang nasugatan.
