28,902 total views
Nakiisa ang Philippine Alliance of Human Rights Advocates (PAHRA) sa isinagawang kilos-protesta sa St. Joseph’s College, Quezon City, upang ipanawagan ang pagbabaligtad ng Korte Suprema sa naunang desisyon nito na idineklarang labag sa Konstitusyon ang impeachment case laban kay Vice President Sara Duterte.
Ayon kay PAHRA Secretary-General Egay Cabalitan, buo ang paninindigan ng human rights group na hindi dapat isinantabi ang proseso ng pananagutan sa pamahalaan.
Ibinahagi ni Cabalitan na ang kinakailangan ng bansa ay mga opisyal o lider na may pananagutan at hindi nakakataas o binabalewala ang mga batas.
“Hindi kami papayag na basta na lang isantabi ang proseso ng pananagutan. The people deserve leaders who are accountable to the law, not above it.” Bahagi ng pahayag ni Cabalitan.
Nakibahagi rin ang iba’t ibang civil society groups kabilang na ang ilang mga lingkod ng Simbahan sa nasabing kilos-protesta na kapwa nananawagan para sa katarungan, katotohanan, at pananagutan.
Bahagi rin ng panawagan ng mga dumalo sa pagkilos ang aprubahan ng Korte Suprema ang Motion for Reconsideration upang muling buhayin ang impeachment laban sa bise presidente na inarchive ng Senado.
Muli namang tiniyak ng PAHRA ang patuloy na pakikiisa sa taumbayan upang isulong ang katotohanan, katarungan, at pananagutan ng mga opisyal ng pamahalaan.
“Ang mga iba’t ibang grupo, organisasyon, at maski mga lider ng simbahan ay nanawagan: Supreme Court, reverse the decision… Sasamahan namin ang taumbayan sa paniningil sa mga nakaupo at sa pagkubli nila sa katotohanan. Hindi kami titigil hangga’t hindi nananagot ang mga dapat managot,” Dagdag pa ni Cabalitan.
Matatandaang una ng kinundina ng ilang opisyal ng Catholic Bishops’ Conference of the Philippines (CBCP) ang naging desisyon ng Senado na i-archive ang impeachment complaint laban sa bise presidente na maituturing na pagtataksil sa taumbayan dahil sa pagkakait ng katarungang panlipunan kaugnay sa usapin ng katiwalian sa kaban ng bayan.
