36,576 total reads
Naghahanda na ang Diocese of Imus para sa pagdiriwang ng Season of Creation 2025 sa Setyembre.
Tema ng Panahon ng Paglikha ngayong taon ang “Peace with Creation” o “Kapayapaan kasama ang Sangnilikha” na paanyaya sa lahat upang pagnilayan ang tungkulin sa pangangalaga sa mga nilikha ng Diyos.
Sa liham-sirkular, hinimok ni Bishop Reynaldo Evangelista ang lahat ng parokya, paaralan, at pamayanan na magsagawa ng mga programang nakatuon sa pagsusulong ng pangangalaga sa nag-iisang tahanan.
“I encourage all parishes, schools, institutions, and Christian communities to participate actively by initiating activities and programs that promote ecological awareness, sustainable practices, and environmental stewardship,” ayon kay Bishop Evangelista.
Pormal na sisimulan ng diyosesis ang isang buwang pagdiriwang sa August 30, 2025, sa Laudato Si’ Farm o SVD Farm sa Tagaytay City.
Tampok dito ang maikling prusisyon sa imahen ni San Francisco ng Assisi, ang patron ng sangnilikha, na susundan ng Banal na Misa na pangungunahan ni Bishop Evangelista.
Magkakaroon din ng Agahan para sa Kalikasan, pamamahagi ng Diocese of Imus Ministry on Ecology (DIMEC) materials and resources, at pagsusumite ng Parish Season of Creation Plans and Programs.
Inaasahan ding magbabahagi ng Keynote Address si University of the Philippines – Los Baños Assistant Professor Jonathan ‘Ethan’ Hernandez.
Ang Diyosesis ng Imus ang unang naglunsad ng Season of Creation sa Pilipinas noong 2009 sa pangunguna ng noo’y Obispo ng Imus, Cardinal Luis Antonio Tagle.
Mula noon, sinundan ito ng iba pang diyosesis sa bansa bilang pagkilala sa likas na yamang handog ng Diyos at bilang panawagan na pangalagaan ang ating nag-iisang tahanan.
Sa buong mundo, ipagdiriwang ang Season of Creation sa buong buwan ng Setyembre hanggang ikaapat ng Oktubre, kapistahan ni San Francisco ng Assisi ngunit, pinalawig ito sa Pilipinas hanggang sa ikalawang Linggo ng Oktubre bilang paggunita sa Indigenous People’s Sunday.
