52,352 total views
Nanawagan ang opisyal ng Caritas Novaliches sa pamahalaan na magtatag ng isang independent body na may sapat na kapangyarihan upang mangalap ng dokumento at ebidensiya kaugnay sa mga sinasabing anomalya sa mga flood control projects sa bansa na nagkakahalaga ng bilyon-bilyong piso.
Ayon kay Fr. Joel Saballa, Deputy executive director ng Caritas Novaliches, magiging mas kapani-paniwala ang resulta ng imbestigasyon kung ito ay pangungunahan ng isang independent group.
“Mas magiging credible ang imbestigasyon kung magtatayo tayo ng independent body na may kapangyarihan na kumuha ng mga documents para malaman kung sino talaga ang pasimuno at nakinabang,” ayon sa pari.
Iginiit din ni Fr. Saballa na dapat pansamantalang bumitiw sa puwesto ang mga opisyal na nasasangkot sa alegasyon upang matiyak na hindi sila makakaimpluwensya sa proseso.
“We should be objective to this. Kailangan may makasuhan dito. Economic sabotage ito, hindi lang simpleng kurapsyon. Panahon na para panagutin sila,” dagdag pa niya.
Binatikos din ng pari ang mga mambabatas na sinasabing sangkot sa iregularidad at nanawagan ng mas mabigat na pananagutan. “Sana may managot na congressman at senador kung kinakailangan,” giit ni Fr. Saballa.
Binigyang-diin ng pari na ang laban kontra korapsyon ay hindi lamang usapin ng batas kundi usapin din ng moralidad at pananagutan sa taumbayan.
Samantala, una nang nagtatag ang Kamara ng Tri-Committee upang magsagawa ng imbestigasyon sa mga alegasyon ng anomalya sa flood control projects, kung saan nasasangkot ang ilang mambabatas.
Ang hakbang ay kasunod ng naging pahayag ni Pangulong Ferdinand Marcos Jr. na pinangalanan ang 15 pangunahing contractor na nakakuha ng pinakamaraming flood control projects sa bansa.
Kabilang dito ang Legacy Construction Corp.; Alpha & Omega General Contractor & Development Corp.; St. Timothy Construction Corp.; QM Builders; EGB Construction Corp.; Topnotch Catalyst Builders Inc.; Centerways Construction & Development Inc.; Sunwest Inc.; Hi-Tone Construction and Development Inc.; Triple 8 Construction & Development Corp.; Royal Crown Monarch Construction & Supplies Corp.; Wawao Builders; MG Samidan Construction; L.R. Tigqui Builders Inc.; at Road Edge Trading & Development Services.
