8,294 total views
Inaanyayahan ng Catholic Bishops’ Conference of the Philippines (CBCP) ang sambayanang Pilipino na makiisa sa “Trillion Peso March” o Araw ng Panalangin at Pananagutan na gaganapin bukas, Linggo, September 21, 2025, sa ganap na alas-2 ng hapon sa EDSA People Power Monument sa Quezon City.
Ayon kay CBCP President, Kalookan Bishop Pablo Virgilio Cardinal David, ang pagkilos na ito ay hindi usaping pulitikal kundi isang moral na paninindigan laban sa katiwaliang patuloy na sumisira sa dangal ng tao at kinabukasan ng bansa.
Hinikayat din ng mga obispo ang mga nasa labas ng Metro Manila na makiisa sa mga prayer rally na inorganisa ng kani-kanilang diyosesis, parokya, Catholic schools, at iba pang faith-based at civic groups.
“Isang pagkilos ng pananampalataya at pagkakaisa laban sa kultura ng katiwalian na patuloy na nananakaw ng dangal ng tao, nagpapalubog sa mahihirap, at sumisira sa kinabukasan ng ating bansa,” pahayag ni Cardinal David.
Binigyang-diin ng CBCP ang kahalagahan ng integridad at pananagutan sa pamumuno, wastong paghubog sa mga kabataan na mahalin ang katotohanan, at mariing pagtutol sa patronage politics at pandarambong.
Nanawagan din ang mga obispo ng suporta para sa malinis na pamahalaan, transparency sa mga kontrata at proyekto, at agarang imbestigasyon laban sa mga anomalya.
Iginiit ni Cardinal David na ang katiwalian ay hindi lamang usapin ng perang ninanakaw kundi isang banta sa mga tahanang laging binabaha, kalikasang patuloy na sinisira, at mga oportunidad na nasasayang para sa kabataan ng susunod na henerasyon.
Hinamon ng kardinal ang mga mambabatas at tagausig na pabilisin ang imbestigasyon, maglatag ng kongkretong solusyon, at iwasan ang anumang delaying tactics upang hindi muling maisantabi ang usapin.
Kasabay nito, hinimok din ng pangulo ng CBCP ang lahat na talikuran ang kayabangan at kasakiman, at sa halip ay piliin ang pagbabalik-loob, katarungan, at pagkakaisa.
“Manindigan tayo para sa katotohanan, katarungan, at pagbabago… Sama-sama tayong bumuo ng isang bansang tapat, makatarungan, at tunay na makatao,” saad ni Cardinal David.
