5,705 total views
Nanawagan si Caritas Philippines President, Kidapawan Bishop Jose Colin Bagaforo ng patuloy na pagkakaisa at sama-samang pagkilos ng mamamayan laban sa lumalalang katiwalian sa bansa.
Sa mensahe sa Radyo Veritas ni Bishop Bagaforo na isa ring convenor ng Church Leaders Council for National Transformation (CLCNT) na nag-organisa sa naganap na Trillion Peso March sa EDSA People Power Monument, ay binigyang-diin ng Obispo na mahalaga ang sama-samang pagtindig ng taumbayan para sa pagbabago at pagpuksa sa katiwalian na maituturing na “salot ng lipunan.”
Ayon kay Bishop Bagaforo, dapat na manatili ang pag-asa sa puso ng bawat isa na magkaroon ng kaliwanagan ang puso at isip ng mga lingkod bayan laban sa sistematikong korapsyon at para sa mabuting pamamahala sa bansa.
“Ang pag-asa natin ay of course ang ating mga kabataan, ang pag-asa natin ay sana magkaroon ng enlightenment ang ating mga leaders pero ang higit sa lahat ang pag-asa natin ay kung tayo ay sama-samang kikilos, magkaisa para sa pagbabago at para mapuksa at mawala na itong corruption na salot ng ating lipunan.” Bahagi ng pahayag ni Bishop Bagaforo sa Radyo Veritas.
Ayon sa CLCNT, layunin ng naganap na Trillion Peso March na manawagan ng pananagutan, katarungan, at katapatan mula sa mga namumuno sa pamahalaan, at palakasin ang tinig ng bayan laban sa kultura ng katiwalian at kawalan ng pananagutan.
Batay sa inisyal na pagtataya, umabot sa humigit kumulang 30,000 ang nakibahagi sa naganap na Trillion Peso March bukod pa sa iba’t ibang mga pagkilos na isinagawa sa iba’t ibang diyosesis at arkidiyosesis sa buong bansa bilang pakikiisa sa National Day of Protest Against Corruption noong Linggo ika-21 ng Setyembre, 2025.
