3,763 total views
Nakaalerto ang Caritas Imus sa posibleng epekto ng Bagyong Opong sa Cavite, matapos iulat na mahigit 25,000 pamilya ang nasa panganib.
Ayon kay Jerel Tabong, Humanitarian Response Coordinator ng Caritas Imus, halos buong lalawigan ang kanilang binabantayan dahil sa malawak na epekto na maaaring idulot ng Bagyong Opong.
Batay sa pre-disaster needs assessment ng Cavite Provincial Disaster Risk Reduction and Management Office (PDRRMO), tinatayang nasa 25,574 pamilya ang posibleng maapektuhan sa iba’t ibang bayan at lungsod ng Cavite.
Kabilang sa mahigpit na binabantayan ng Caritas Imus ang coastal areas at flood-prone communities na madalas unang makaranas ng pagbaha at malalakas na hangin tuwing may bagyo.
“Mayroon na kaming na-monitor na activate ng preemptive evacuation gaya ng Ternate at Naic. On-going pa po ang data collection namin,” pahayag ni Tabong sa panayam ng Radyo Veritas.
Dagdag pa ni Tabong, hindi lamang ang mga potensyal na lugar ng evacuation ang kanilang tinututukan kundi maging ang pakikipag-ugnayan sa iba’t ibang parokya, barangay, at local government units upang matiyak na may sapat na paghahanda at mabilis na pagtugon kung kinakailangan.
Binibigyang-pansin din ng Caritas Imus ang kalagayan ng mga pinaka-mahihirap na pamilya at mga sektor na madaling maapektuhan ng kalamidad, tulad ng mga mangingisda, magsasaka, at mga nakatira sa tabing-dagat at tabing-ilog.
Bagama’t wala pang binubuksang simbahan bilang evacuation center, tiniyak ng Caritas Imus na handang ipagamit ng mga parokya ang mga pasilidad sakaling hilingin ng LGUs
“Wala pa po sa ngayong [binuksang simbahan], pero just in case na kailanganin ng LGU ay aming bubuksan,” ayon kay Tabong.
Batay sa huling ulat ng Philippine Atmospheric, Geophysical, and Astronomical Services Administration (PAGASA), kasalukuyan nang nasa Mindoro Strait ang Bagyong Opong taglay ang lakas ng hanging aabot sa 110 km/h, at pagbugsong aabot sa 150 km/h, habang kumikilos pa-kanluran sa bilis na 35 km/h.
Nakataas naman ang Signal No. 2 sa lalawigan ng Cavite , habang Signal No. 1 naman sa Metro Manila.
Patuloy na kikilos ang bagyo patungong West Philippine Sea ngayong gabi at lalabas ng Philippine Area of Responsibility bukas ng hapon.
