7,093 total reads
Binigyang diin ni incoming Cebu Archbishop Alberto Uy na ang krus ang tunay na sagisag ng pagiging kristiyano, lalo na sa pagninilay sa buhay ni San Vicente de Paul, na kilala sa kanyang malasakit sa mga dukha.
Ayon sa arsobispo, nakikita ni San Vicente de Paul ang mukha ni Hesus sa mga dukha, kaya’t hindi lamang siya humanga kay Hesus, kundi isinabuhay ang mga halimbawa ni Kristo sa pamamagitan ng paglilingkod sa mga may karamdaman at mga inaabandona sa lipunan.
“The Cross is the center. Jesus reminds us that the heart of Christianity is not just miracles but the Cross. The Cross is love in action. It is sacrifice for others,” ayon sa pagninilay ni Archbishop Uy.
Ipinakita ni San Vicente de Paul ang tunay na diwa ng pagiging Kristiyano, hindi lamang sa pagninilay, kundi sa aktuwal na paglilingkod sa mga mahihirap at nangangailangan. Kaya’t tinagurian siya bilang patron ng mga gawaing kawanggawa.
Batid ni Archbishop Uy na hindi madali ang pagsunod kay Hesus, sapagkat ang pagbabata ng krus ay mabigat, subalit ito ang tunay na daan ng pag-ibig at walang hanggang kaligayahan.
Sa harap ng mga hamon ng kasalukuyang kalagayan ng bansa, kung saan marami ang nahihirapan dulot ng iba’t ibang suliranin, hamon ng arsobispo sa bawat isa na tularan ang mga halimbawa ni San Vicente de Paul.
“When we help a poor family, we carry the Cross with Jesus. When we show patience to someone difficult, we carry the Cross. When we choose honesty instead of corruption, even if it costs us, we carry the Cross,” dagdag ng arsobispo.
Dalangin ng arsobispo na nawa’y matularan ng mamamayan ang mga halimbawa ng santo na may malasakit sa kapwa.
“Lord, teach us to see You in the poor, and give us generous hearts to serve them. Like the disciples, we may not always understand the mystery of the Cross. But like St. Vincent, we can live it—through concrete acts of love,” giit ni Archbishop Uy.
Noong 2023, ayon sa datos ng Philippine Statistics Authority, nasa 15.5 percent ng mga Pilipino, o katumbas ng 17 milyong indibidwal, ang nakararanas ng kahirapan.
Sa kabila nito, patuloy ang hamon ng arsobispo sa bawat isa na ipamalas ang pagmamahal kay Hesus sa pamamagitan ng pagpapakita ng malasakit sa mga dukha.
