11,927 total views
Sa gitna ng pinsalang dulot ng 6.9 magnitude na lindol sa Cebu, binigyang-diin ni Regalado Jose Jr., Pangulo ng Pambansang Komisyong Pangkasaysayan ng Pilipinas (NHCP), ang kahalagahan ng mga lumang simbahan bilang mahalagang bahagi ng pambansang pamana at pagkakakilanlan ng mga Filipino.
Ayon kay Jose, ang mga makasaysayang istrukturang ito ay hindi lamang simbolo ng pananampalataya kundi patunay din ng husay at kaalaman ng mga Filipino sa larangan ng arkitektura at pagtatayo ng matitibay na gusali noong panahon ng kolonyalismo.
“Ang mga istrukturang nakikita natin ngayon ay bahagi ng pamana na nagmula pa sa colonial period. Ipinapakita nito ang kaalaman at galing ng mga Filipino sa pagtatayo ng simbahan at fortification,” pahayag ni Jose.
Kabilang sa mga naapektuhan ang Sts. Peter and Paul Parish Church sa Bantayan at ang Saint Rose of Lima Parish Church sa Daanbantayan.
Makikita sa simbahan sa Daanbantayan ang pinong pagtabas at maayos na pagkakalapat ng mga batong korales, at nakaukit pa sa harapan ng simbahan ang pangalan ng paring nagpatayo nito, si Fr. Feliciano Torres, isang Cebuano priest, noong 1886.
“Hindi lamang mga paring Kastila ang nagpatayo ng simbahan. May mga halimbawa rin na mismong mga paring Filipino ang nanguna, gaya ng sa Daanbantayan,” dagdag pa ng opisyal.
Binanggit din niya na ilan pang makasaysayang simbahan sa bansa—tulad ng Molo Church (St. Anne Parish Church) sa Iloilo, Tabaco Church (St. John the Baptist Parish Church) sa Albay, at Tayum Church (Santa Catalina de Alejandria Parish Church) sa Abra—ay kinikilala bilang mga National Cultural Treasures na itinayo rin sa pangunguna ng mga paring Filipino.
Dagdag ni Jose, mahalaga ang agarang pagbibigay tuon sa pagpapanatili at pagpapanauli ng mga nasirang simbahan upang mapanatili ang kanilang kasaysayan at maipasa ito sa susunod na henerasyon.
Inaasahand ding magtutungo si Jose sa Cebu, upang magsagawa ng assessment sa mga nasirang simbahan, at iba pang makasaysayang istraktura.
Ayon pa kay Jose na kasalukuyang nasa budget hearing sa Kamara, agad silang makikipag-ugnayan sa pamunuan ng Arkidiyosesis ng Cebu at pamahalaang panlalawigan para na rin sa mga kaukulang hakbang sa seguridad ng mga cultural property ng simbahan.
