10,339 total reads
Naglabas ng abiso ang Arkidiyosesis ng Cebu kasunod ng naranasang magnitude 6.9 earthquake sa lalawigan kagabi.
Sa pamamagitan ni Archdiocesan Chancellor, Msgr. Renato Beltran, Jr., ipinag-utos ni Archbishop Alberto Uy na isailalim muna sa structural assessment ang lahat ng simbahan at kumbento upang matiyak ang kaligtasan ng mga ito.
Partikular na pinaalalahanan ni Archbishop Uy ang mga parokya sa Hilagang bahagi ng Cebu na matinding naapektuhan ng lindol.
Pansamantalang ipinagbabawal ang paggamit ng mga simbahan para sa pagdiriwang ng Banal na Misa hangga’t hindi pa natitiyak ng mga dalubhasa ang kaligtasan ng mga gusali.
“To the parishes in the North [Cebu] that have been gravely affected, you are asked to refrain from using your churches for the celebration of the Holy Mass until the proper experts have carried out the assessment and declared the structures safe for use,” ayon sa abiso ng arkidiyosesis.
Kasabay nito, nanawagan ang arkidiyosesis sa lahat na patuloy na manalangin para sa kapanatagan at kalakasan ng loob sa gitna ng pagsubok.
“We entrust ourselves, our families, and our communities into His merciful hands. May the Lord shelter us under His wings, protect us from every harm, and guide us to safety and peace,” ayon sa arkidiyosesis,
Samantala, sa isang Facebook post, tiniyak ni Archbishop Uy na siya ay nasa ligtas na kalagayan at kasalukuyang nakikipagpulong kasama ang ilang kawani at pari ng arkidiyosesis upang magplano ng pagtulong sa mga biktima ng lindol.
“Friends, I’m okay. I may not reply right away as we’re working on how to help the earthquake victims. Thanks for your prayers,” ayon kay Archbishop Uy.
Batay sa ulat ng Philippine Institute of Volcanology and Seismology (PHIVOLCS), niyanig ng magnitude 6.9 earthquake ang Bogo City, Cebu, alas-9:59 ng gabi nitong September 30, 2025, kung saan naramdaman ang pagyanig sa buong Cebu at mga karatig na lalawigan.
Sa monitoring ng PHIVOLCS, umabot na sa mahigit 200 ang naitalang aftershock kasunod ng malakas na pagyanig.
Iniulat naman ng National Disaster Risk Reduction and Management Council (NDRRMC) na umabot na sa 26 ang nasawi, habang 147 ang sugatan, at wala pang naitatalang nawawala.
