12,604 total reads
Ibinahagi ni Ipil, Zamboanga Sibugay Bishop Glenn Corsiga ang personal na karanasan sa naganap na magnitude 6.9 earthquake na yumanig sa Cebu nitong September 30, 2025.
Si Bishop Corsiga ay kabilang sa mga dumalo sa solemn canonical possession ni Cebu Archbishop Alberto Uy, at kasalukuyang nagpapahinga sa ikatlong palapag ng isang hotel malapit sa Our Mother of Perpetual Help – Redemptorist Church sa Cebu City nang biglang yanigin ang gusali.
Ayon sa obispo, ang kanyang karanasan ay nagpaalala sa mamamayan hinggil sa kahalagahan ng kahandaan sa ganitong uri ng sakuna.
“That was one kind of a horrific experience… when you are given a time to save your life and there was no one to help you because all of you have the same perpetual goal in that short moment,” pagbabahagi ni Bishop Corsiga.
Bunsod nito, hinimok ni Bishop Corsiga ang publiko na paigtingin ang kahandaan sa pamamagitan wastong kaalaman at disiplina upang maiwasan ang pagkataranta at sisihan sa panahon ng kalamidad.
Ilan pa sa kanyang paalala ang regular na pagpapasuri ng mga bahay at gusali, pagkakaroon ng first aid kit, fire extinguishers, at sapat na suplay ng tubig, gayundin ang aktibong pakikilahok sa earthquake drills at rescue trainings.
Nanawagan din ang obispo ng pakikiisa sa pagtulong sa mga biktima ng lindol, kabilang ang pagbabahagi ng donasyon para sa mga nasalanta.
Hinimok din ni Bishop Corsiga ang lahat na mag-alay ng panalangin para sa mga nasawi at mga naulilang pamilya.
“Let us ask God to break the light of each day that those who live in the darkness of suffering, may come to grow hope in their hearts to see the blessing of tomorrow,” dagdag pa ni Bishop Corsiga.
Samantala, iniulat ng Philippine Institute of Volcanology and Seismology (PHIVOLCS) na mahigit 300 aftershocks na ang naitala kasunod ng malakas na lindol, habang ayon sa National Disaster Risk Reduction and Management Council (NDRRMC) ay higit 60 na ang nasawi at inaasahang madaragdagan pa habang nagpapatuloy ang search and rescue operations.
