12,650 total reads
Hinimok ni Cebu Archbishop Alberto Uy ang mamamayan na isabuhay ang “mission of love” ng mga anghel sa pagdiriwang ng kapistahan ng Guardian Angels nitong October 2.
Sa kanyang homiliya, nanawagan ang arsobispo sa bawat isa na maging “guardian angel” para sa kapwa, lalo na sa mga naapektuhan ng 6.9 magnitude na lindol na tumama sa Cebu kamakailan.
“Let us promise to be angels for one another—especially by sharing our blessings generously with the victims of the earthquake and all who are in need,” ayon kay Archbishop Uy.
Binigyang-diin ng arsobispo na sa kasalukuyang kalagayan ng maraming pamilya sa Northern Cebu na nawalan ng tahanan at kabuhayan, mahalagang magbahaginan ng makakayanan—pagkain, damit, pansamantalang matutuluyan, at higit sa lahat, mga panalangin.
“To be a guardian angel for someone is to protect the weak, to accompany the lonely, and to give hope to those who have lost much,” dagdag pa ng arsobispo.
Batay sa tala ng National Disaster Risk Reduction and Management Council (NDRRMC), umabot na sa 72 ang nasawi, mahigit 200 ang sugatan, at higit 200,000 katao ang apektado ng lindol.
Limang simbahan sa arkidiyosesis ang napinsala, kabilang ang Archdiocesan Shrine of Santa Rosa de Lima sa Daanbantayan; Parroquia de San Pedro Apostol sa Bantayan Island; St. Martin de Porres Parish sa Tabogon; San Sebastian Parish sa Borbon; at San Juan Nepomuceno Parish sa San Remigio.
Ayon kay Archbishop Uy, ang kapistahan ng Guardian Angels ay hindi lamang araw ng pasasalamat kundi araw din ng hamon.
“This feast is a day of gratitude—to God for His constant care, and to our guardian angels for their tireless presence. But it is also a day of challenge,” saad ni Archbishop Uy.
Ang kapistahan ng Guardian Angels ay ipinagdiriwang tuwing Oktubre 2. Nagsimula ito noong ika-16 na siglo at pormal na isinama sa Roman Calendar ni Pope Paul V noong 1615.
photo from Archdiocesan Shrine of Sta. Rosa de Lima/Facebook
