15,282 total views
Ibinahagi ni Cebu Archbishop Alberto Uy ang pakikiramay at panalangin ng Kanyang Kabanalan Leon XIV para sa mga biktima ng magnitude 6.9 earthquake sa lalawigan ng Cebu.
Ayon kay Archbishop Uy, personal siyang tinawagan ni Papal Nuncio to the Philippines, Archbishop Charles Brown, upang iparating ang taos-pusong pakikiramay ng Santo Papa sa mga pamilyang nawalan ng mahal sa buhay at sa lahat ng patuloy na humaharap sa hirap dulot ng trahedya.
Nagpahayag din ng panalangin si Pope Leo XIV para sa kaligtasan, kagalingan, at agarang pagbangon ng mga apektadong komunidad.
“The Apostolic Nuncio to the Philippines, Archbishop Charles John Brown, called me to convey the Holy Father’s heartfelt sympathies for all the survivors of the earthquake, and his prayers for the eternal repose of the victim,” pagbabahagi ni Archbishop Uy.
Malapit na sa puso ng Santo Papa ang Pilipinas, lalo na ang Cebu, dahil noong 2004 at 2010 ay bumisita siya, bilang noo’y Prior General ng Order of Saint Augustine, sa Augustinian Province of Santo Niño de Cebu.
Samantala, isinailalim na sa state of calamity ang buong lalawigan ng Cebu bunsod ng patuloy na pagtaas ng bilang ng mga nasawi, malawakang pinsala sa mga imprastruktura, at pagkaantala sa mga pangunahing serbisyo.
Patuloy rin ang pagtutulungan ng simbahan at pamahalaan upang matiyak ang mabilis na pagtugon at pag-agapay sa mga biktima, lalo na sa Bogo City na siyang episentro ng lindol.
