26,305 total reads
Tutulong ang Caritas Manila sa mga Cebuanong lubhang naapektuhan ng 6.9 magnitude na lindol na puminsala sa lalawigan noong Setyembre 30.
Ayon kay Fr. Anton Pascual, executive director ng social arm ng Archdiocese of Manila, nakikipag-ugnayan na sila sa Caritas Cebu upang agad na makapaghatid ng tulong sa mga apektadong komunidad.
“Una sa lahat tayo ay nananalangin para sa kaligtasan ng mga Cebuano. Tayo ay handang tumulong para sa relief, rehabilitation, at reconstruction ng mga napinsala ng lindol. Tayo ay handang tumulong sa pamamagitan ng Caritas Cebu,” pahayag ni Fr. Pascual sa Radyo Veritas.
Batay sa ulat ng National Disaster Risk Reduction and Management Council (NDRRMC), mahigit 70 katao na ang nasawi habang mahigit 200 ang sugatan. Tinatayang nasa 200,000 indibidwal din ang labis na naapektuhan ng sakuna, partikular sa Bogo City, Cebu, na tinukoy bilang epicenter ng lindol.
Binigyang-diin ni Fr. Pascual ang kahalagahan ng pagtutulungan sa ganitong mga pagkakataon upang maibsan ang paghihirap ng mga naapektuhan at matulungang mabilis silang makabangon mula sa trahedya.
Samantala, ipinag-utos ni Cebu Archbishop Alberto Uy sa mga parokya ang pagpapatupad ng inisyatibong “adopt a parish”, kung saan ang mga parokyang hindi naapektuhan ng lindol ay tutulong sa mga parokyang labis na nasalanta upang matiyak ang pantay na paglingap sa mga komunidad.
Kasabay nito, puspusan ang ginagawang structural assessment sa mga simbahan at rectory ng arkidiyosesis, lalo na sa hilagang bahagi ng Cebu na matinding tinamaan ng malakas na pagyanig.
