31,054 total reads
Itinalaga ni Pope Leo XIV si Ilagan Bishop David William Antonio bilang bagong Arsobispo ng Archdiocese of Nueva Segovia sa Ilocos Sur.
Ipinahayag ng Vatican ang naturang pagtatalaga matapos tanggapin ng Santo Papa ang pagretiro ni Archbishop Marlo Peralta, na umabot na sa mandatory retirement age na 75.
Si Archbishop-designate Antonio, na tubong Nagtupacan, Sto. Domingo, Ilocos Sur, ay ipinanganak noong December 29, 1963.
Nagtapos ng philosophy sa San Pablo Seminary sa Baguio City at theology naman sa Immaculate Conception School of Theology sa Vigan City.
Kalaunan ay nagkamit ng Doctorate in Theology sa Catholic University of America sa Washington, D.C.
Naordinahang pari ng Archdiocese of Nueva Segovia noong December 1, 1988. Naging professor siya ng Immaculate Conception School of Theology at dean of studies ng seminaryo mula 1993 hanggang maitalaga bilang rector.
Noong 2005, nagsilbi rin siyang Kura Paroko ng Saint Lucy Parish sa Ilocos Sur at naging vicar general ng arkidiyosesis.
Itinalaga naman siya ni Pope Benedict XVI bilang Auxiliary Bishop ng Archdiocese of Nueva Segovia noong June 15, 2011, at ginawaran ng episcopal ordination noong August 26 ng parehong taon.
Noong March 2018, hinirang siya bilang Apostolic Administrator ng Apostolic Vicariate of San Jose sa Mindoro, at kalaunan ay naging Obispo ng Diocese of Ilagan noong November 2018, kung saan siya pormal na iniluklok noong February 2019.
Bilang bagong arsobispo, ipapastol ni Archbishop-designate Antonio ang mahigit kalahating milyong Katoliko ng arkidiyosesis, katuwang ang higit 80 mga pari.
Ang Archdiocese of Nueva Segovia, isa sa mga pinakamatandang arkidiyosesis sa bansa, ay may mahalagang papel sa kasaysayan ng Simbahang Katolika sa Pilipinas.
