47,723 total views
Nagpapatuloy ang isinasagawang monitoring at assessment ng Social Action Center (SAC) ng Diocese of San Carlos matapos ang matinding pinsalang iniwan ng bagyong Tino sa Negros Occidental, lalo na sa Canlaon City.
Ayon kay Fr. Ricky Beboso, SAC Director ng diyosesis, hindi inaasahan ng mga residente ang biglaang pagbaha sa lungsod dahil matatagpuan ito sa mataas na bahagi ng lalawigan.
“Their National roads are now considered river. Unexpected flash flood happened [last Tuesday] because Canlaon [City] is an uphill city. Flooding is never expected in this city,” ayon kay Fr. Beboso
Sa inisyal na ulat ng diyosesis, 12 katao ang kumpirmadong nasawi at 14 pa ang nawawala sa Canlaon City dahil sa biglaang pagragasa ng tubig.
Patuloy naman ang pakikipag-ugnayan ng simbahan sa mga lokal na kinauukulan at relief agencies upang matugunan ang agarang pangangailangan ng mga biktima.
Nanawagan si Fr. Beboso ng sama-samang panalangin at pagkilos para sa mga apektado, at tiniyak ng Diocese of San Carlos ang kanilang patuloy na presensya at pagtulong sa mga nasalanta ng bagyo.
Batay naman sa ulat ng Provincial Government of Negros Occidental, mahigit 134,000 indibidwal o 39,000 pamilya mula sa 29 bayan at lungsod ang labis na naapektuhan ng Bagyong Tino.
Sa pinakahuling datos ng National Disaster Risk Reduction and Management Council (NDRRMC), umabot na sa 114 ang kumpirmadong nasawi, 82 ang sugatan, at 127 ang nawawala mula sa mga lalawigan ng Antique, Capiz, Iloilo, Bohol, Cebu, Leyte, Southern Leyte, Negros Occidental, Negros Oriental, at Agusan del Sur.
Inaasahan pang madaragdagan ang bilang ng mga nasawi at nawawala habang nagpapatuloy ang search and rescue operations sa mga lugar na labis na sinalanta ng kalamidad.
