29,277 total reads
Nagpahayag ng pasasalamat ang social arm ng Archdiocese of Lingayen-Dagupan matapos maranasan ang matinding pagbaha dulot ng Bagyong Uwan.
Ayon kay Caritas Lingayen-Dagupan Executive Director, Ms. Janice Hebron, halos lahat ng barangay sa Dagupan City, Pangasinan, at sa mga baybaying bayan na saklaw ng arkidiyosesis ay lumubog sa baha na umabot hanggang dibdib dahil sa storm surge at high tide.
“Salamat sa Diyos, we survived Uwan. Mabilis namang bumaba ang tubig-baha nang humupa na rin ang hangin,” ayon kay Hebron.
Ibinahagi rin ni Hebron na may ilang lugar pa rin ang walang kuryente at mahina ang signal ng internet.
Dagdag pa niya, malaki ang naitulong ng mga pasilidad ng mga parokya at ng Archdiocesan Formation Center sa Dagupan City na nagsilbing evacuation center para sa mga residenteng nagsilikas dahil sa bagyo.
Sa kasalukuyan, karamihan ng evacuees ay nakabalik na sa kanilang mga tahanan.
“We housed evacuees at the Archdiocesan Formation Center in Dagupan City. The Parishes in the different Catchment-Municipalities of the Archdiocese were also used as Evacuation Centers. Most of the evacuees are now back in their respective homes,” ayon kay Hebron.
Tiniyak naman ng Caritas Lingayen-Dagupan ang patuloy na pakikipag-ugnayan sa mga lokal na pamahalaan at mga parokya upang matugunan ang agarang pangangailangan ng mga apektadong pamilya.
Batay sa Philippine Atmospheric, Geophysical and Astronomical Services Administration (PAGASA), nasa labas na ng Philippine Area of Responsibility (PAR) ang Bagyong Uwan, ngunit posibleng muling pumasok sa Miyerkules ng gabi habang tumatama sa timog-kanlurang bahagi ng Taiwan, na magdudulot ng karagdagang paghina nito.
