18,284 total views
Kinilala ng mga Diyosesis ng Tagbilaran at Talibon ang Holy Name University (HNU) bilang The Catholic University of Bohol, isang makasaysayang pagkilalang nagpapatibay sa misyon nitong maghatid ng edukasyong nakaugat sa pananampalatayang Kristiyano.
Sa isinapublikong kautusan na nilagdaan nina dating Tagbilaran Bishop Alberto Uy at Bishop Patrick Daniel Parcon ng Talibon, ipinahayag ng Simbahan na ang bagong titulo ay sagisag ng natatanging misyon ng HNU bilang sentro ng talino at pananampalataya sa Bohol.
“We hereby grant unto the Holy Name University the title of The Catholic University of Bohol. By this designation, the Catholic University of Bohol shall serve as a hub for intellectual and spiritual life in the Dioceses of Tagbilaran and Talibon, and act as a beacon of Catholic thought, ensuring that the Gospel message informs and shapes the pursuit of knowledge and the formation of students,” ayon kina Bishops Uy at Parcon.
Ipinahayag ng mga obispo ang kanilang tiwala sa patuloy na papel ng unibersidad sa pagsusulong ng dangal ng tao, pamanang kultural, at edukasyong nakaugat sa Ebanghelyo.
“Through the years, the University has consistently operated as a private, Catholic, co-educational institution serving the educational needs of the province and the wider community,” dagdag pa nila.
Ang pagkilalang ito ay bunsod ng petisyon ni Fr. Ruel F. Lero, S.V.D., pangulo ng HNU, na inihain noong Pebrero 18, 2025. Matapos ang masusing pagsusuri ng mga kaukulang tanggapan, pinagtibay nina Bishops Uy at Parcon ang nasabing pagkilala noong Agosto 15, 2025, kasabay ng pagdiriwang ng ika-164 anibersaryo ng ordinasyon ni Saint Arnold Janssen, tagapagtatag ng Society of the Divine Word (S.V.D.).
Itinatag ang Holy Name College noong 1947 ni Rev. Alphonse Lesage, S.V.D., sa patnubay ni dating Tagbilaran Bishop Julio Rosales. Noong 1964, ganap itong nailipat sa pamamahala ng Society of the Divine Word at tinawag na Divine Word College of Tagbilaran (DWC-T). Taong 2001 naman nang ito ay ginawaran ng katayuang unibersidad at muling tinawag na Holy Name University.
