59,859 total views
Hinamon ni Akbayan Partylist Rep. Perci Cendaña ang administrasyong Marcos at liderato ng Kamara na isertipika bilang ‘urgent’ ang pagsasabatas ng P200 minimum wage hike.
Ayon kay Cendaña, ito ay kung tunay ang hangarin ng gobyerno na maibalik ang tiwala ng publiko.
Sinabi pa ng mambabatas, nawa ay pakinggan ng Pangulong Ferdinand Marcos Jr., ang panawagan ng taong bayan sa ginanap na Trillion Peso March at ang binitiwang hamon ni Kalookan Bishop, Cardinal Pablo Virgilio David.
“Tutal sabi ng Palasyo minonitor ni Pres. Marcos ang Trillion Peso March kahapon, sana naman pinakinggan ng pangulo ang paalala ni Cardinal David sa kanya na ‘magtrabaho ka naman’. Those words should carry more weight than the opinions of his unsympathetic economic managers who sabotaged the wage hike increase last year,” ayon kay Cendaña.
Hinimok din ni Cendaña, ang mga kapwa mambabatas na agad na isabatas ang panukalang umento kung nais nilang maibalik ang tiwala ng bayan.
Giit pa ng mambabatas, “Kung seryoso ang Kamara na makuha ang tiwala ng taumbayan, dapat minamadali natin ang pagtaas ng kinikita ng mga manggagawa. Hirap magtiwala ang taumbayan sa mga pangakong reporma kung nakikita nila ang agwat ng pamumuhay ng mga public officials sa pamumuhay nila.”
Bukod kay Cendaña, kasama ring umakda sa House Bill 766 o P200 wage hike sina Representatives Chel Diokno, Dadah Kiram Ismula, at Dinagat Islands Rep. Kaka Bag-ao na kasalukuyang nakabinbin sa House Committee on Labor and Employment.
