72,785 total reads
Inanunsiyo ni Pangulong Ferdinand R. Marcos Jr. ang pagpapatupad ng general amnesty para sa mga hindi nabayarang kontribusyon sa Philippine Health Insurance Corporation (PhilHealth), na sakop ang mga employer, may-ari ng negosyo, at mga self-employed member.
Ayon sa anunsiyo ng Pangulo, bibigyan ang mga benepisyaryo ng isang taong palugit upang bayaran ang lahat ng hindi nabayarang kontribusyon mula Hulyo 2013 hanggang Disyembre 2024.
Kasabay nito, ipatutupad din ang one-time waiver para sa interes ngayong 2026 upang mas mapagaan ang pagbabayad.
“Alam naman namin na ‘yung three percent na binabayad para sa PhilHealth eh medyo – na buwan-buwan ay nara – ramdam na ramdam ng ating mga kababayan. Kaya’t gagawa po tayo at inutusan ko po ang PhilHealth, gagawa tayo nitong taon na ito, 2026, ang tinatawag naming one-time waiver para sa interest ngayong taon 2026,” ayon sa mensahe ng Pangulo.
Inatasan ni Pangulo Marcos ang PhilHealth na tiyaking maayos at mabilis ang pagpapatupad ng amnesty.
Sa kanyang video message, binigyang-diin ng Pangulo na layunin ng hakbang na mapagaan ang pasanin ng publiko sa gastusin sa healthcare at iba pang pang-araw-araw na suliranin.
Sinabi ni Pangulong Marcos, “Hinihikayat din natin ang ating mga employer na i-update na ang lahat ng information ninyo at magrehistro – irehistro ang mga empleyado ninyo sa Yaman ng Kalusugan o ‘yung ating tinatawag na YAKAP program. Kaya po ito po ay patuloy naming ginagawa upang pagaanin ang dala ng ating mga kababayan tungkol nga sa mga healthcare costs at sa lahat ng iba’t ibang hamon na hinaharap ng ating mga kababayan araw-araw.”
Ayon sa pagtaya, nasa mahigit 300,000 ang makikinabang sa programa, na makatutulong sa pagbibigay ng mas maayos at pantay na access sa serbisyong pangkalusugan.
