30,554 total reads
Bagama’t mga abo, ang bawat isa ay nilikha ng Panginoon na kanyang kawangis.
Ito ang binigyan diin ni Cubao Bishop-emeritus Honesto Ongtioco kasabay ng paggunita ng sambayanang Kristiyano sa Miyerkules ng Abo, ang hudyat ng pagsisimula ng Kuwaresma.
Ayon sa dating obispo ng Diyosesis ng Cubao, ang pagpapahid ng abo ay tanda ng pagiging makasalanan, gayundin ang paalala sa kamatayan.
Paliwanag ni Bishop Ongtioco sa misang ginanap sa Veritas Chapel, na ang bawat isa ay mula sa alabok at sa alabok din hahantong, subalit dahil din sa kabutihan ni Hesus na tinubos ang sangkatauhan mula sa kasalanan ang siyang nagbukas sa buhay na walang hanggan.
“Tandaan mo… Ikaw ay alabok at sa alabok ka babalik.” Oo, sa alabok nga tayo nanggaling, pero anong nangyari? —Si Hesus ay naging tao. So, ibig sabihin, nakibahagi [Siya] sa ating kahinaan, sa ating, ah, abang kalagayan; “Pero alabok, pa’no ka nilikha ng Diyos?” —Hiningahan ka. Dati, walang kabuhay-buhay; [pero] dahil sa Kanyang hininga, binahaginan ka ng Kanyang buhay, naging tao ka, isang nilikha, kawangis ang Diyos. Binahaginan ng Diyos ang Kanyang kabanalan. [At] ‘yon ang dapat po nating tandaan,” ayon kay Bishop Ongtioco.
Binigyan diin din ng obispo ang tatlong pangunahing gawain ngayong Kuwaresma, mahalagang isaalang-alang ng mga mananampalataya.
Una, panalangin. Kahit maikli, basta galing sa puso at may pasasalamat o panawagan sa gabay ng Diyos. Pangalawa, pag-aayuno at pagtitimpi. Hindi lamang sa pagkain—maaaring bawasan ang oras sa aliw o luho at ituon sa mabuting gawa at pagbabasa ng Salita ng Diyos.
Pangatlo, kawanggawa. Hindi laging pera; simpleng pakikinig, pakikipagkapwa, at pagtulong sa nangangailangan ay malaking biyaya at pagpapakita ng tunay na pagmamahal.
Ayon kay Bishop Ongtioco, ang maliliit na gawaing may puso at pagmamahal ay higit na mahalaga sa Diyos kaysa sa mga nakikita lamang ng tao.
Hinihikayat din ng obispo niya ang lahat na gawing makabuluhan ang apatnapung araw na paglalakbay sa Kuwaresma, at tanggapin ang buhay at pag-asa na hatid ni Hesus—mula sa alabok, tayo’y ginawang mahalaga at pinagpala.
