9,722 total reads
Itinakda na ng House Committee on Justice ang pagdinig kaugnay sa apat na impeachment complaint laban kay Vice President Sara Duterte sa susunod na linggo.
Ayon kay Justice Committee Chairperson Gerville Luistro, sisimulan na ng komite ang pagtalakay ng mga verified complaints kaugnay sa ‘sufficiency in form and substance’ simula sa March 2, 3 at 4.
“We are dedicating Monday, Tuesday and Wednesday as our initial hearing dates for the impeachment complaints against the Vice President. Kung matapos sa March 2, yung sufficiency in form so that’s it, we will be moving for the sufficiency in substance on the subsequent dates. Pero, kung hindi siya matapos we can continue the deliberation on the succeeding dates,” ayon kay Luistro.
Gayunman sakaling hindi matapos ay bukas din ang komite na palawigin ang talakayan kahit nakabakasyon ang Kamara.
“Again, because this is a very important process, sabi ko nga this is an extraordinary power that was given to the sovereign Filipino to impeach high ranking officials, we do not want to delay impeachment proceedings,” ayon pa sa mambabatas.
Ayon kay Luistro, “We are incline to continue the hearing even during recess.”
Sinabi pa ni Luistro, hindi maaring maantala ang pagtalakay sa usapin ng impeachment na sasailalim din sa kaparehong proseso ng impeachment case ni Pangulong Ferdinand Marcos Jr.
Binigyan diin naman ng kongresista na karapatan din ng Bise Presidente kung nais nitong dumalo sa pagdinig.
Unang inihain ang reklamo noong Pebrero 2 ng Makabayan bloc. Sumunod ang ikalawang reklamo na inendorso nina Mamayang Liberal Partylist Rep. Leila de Lima at Akbayan Rep. Perci Cendaña.
Ang ikatlo ay inihain naman ng pribadong mamamayan, kabilang ang mga pari, madre, abogado at lider ng iba’t ibang organisasyon. Habang ang ikaapat naman ay isinumite ni Atty. Nathaniel Cabrera.
Sa ilalim ng Artikulo XI ng 1987 Konstitusyon, maaaring ma-impeach ang Bise Presidente dahil sa culpable violation of the Constitution, pagtataksil sa tiwala ng bayan, katiwalian, panunuhol at iba pang mabibigat na krimen.
