Pinaalalahahan ng Catholic Bishops’ Conference of the Philippines – Episcopal Commission on Healthcare ang mamamayan na ang tuberculosis (TB), bagama’t nakahahawa, ay nagagamot at hindi dapat itago o maging dahilan ng pag-iwas sa mga pasyente.
Ayon kay CBCP-ECHC Executive Secretary, Fr. Dan Cancino, MI, kahit sino ay maaaring magkaroon ng TB, anuman ang katayuan sa buhay o lugar na pinagmumulan.
“Ang tuberculosis ay nagagamot, hindi dapat pandirihan at hindi dapat itago. Kahit sino puwedeng magkaroon ng TB — mayaman man o mahirap, taga-Luzon, Visayas o Mindanao. Lahat tayo puwedeng tamaan nito,” ayon kay Fr. Cancino.
Aminado ang pari na kabilang ang Pilipinas sa mga bansang may mataas na kaso ng TB, ngunit iginiit na hindi ito dapat maging dahilan upang mawalan ng pag-asa.
Sa halip, sinabi ni Fr. Cancino, ito’y dapat magsilbing panawagan para sa sama-samang pagkilos ng bawat sektor ng lipunan upang malabanan ang sakit.
Hinimok ng pari ang publiko na magkaroon ng mataas na health-seeking behavior at agad na magpakonsulta lalo na kapag inuubo nang dalawang linggo.
“Pangalagaan natin ang ating kalusugan. Pumunta sa doktor, magpa-check-up po tayo. Kapag tayo’y inuubo ng dalawang linggo, huwag natin pabayaan. Kumonsulta sa pinakamalapit na health center,” payo ni Fr. Cancino.
Dagdag ni Fr. Cancino, kapag nagpositibo sa TB test ay dapat magpa-enroll sa treatment centers upang mabigyan ng libreng gamot mula sa pamahalaan.
Binigyang-diin ng pari na mahalaga ang tuloy-tuloy at tamang pag-inom ng gamot upang tuluyang gumaling at maiwasan ang paglala ng sakit.
“Huwag matakot lumapit at humingi ng tulong. May mga doktor at nurse na handang tumulong. Kapag tuloy-tuloy ang gamutan, babalik ang sigla, babalik ang kalusugan, at babalik ang saya ng pamilya,” saad ni Fr. Cancino.
Batay sa pinakahuling tala ng Department of Health – Integrated Tuberculosis Information System (ITIS), halos 200,000 kaso ng tuberculosis ang naitala sa bansa mula Enero hanggang Hunyo 2025.
Samantala, ayon sa ulat ng World Health Organization at DOH, nakatakdang maisailalim sa TB screening ang humigit-kumulang 12 milyong Filipino pagsapit ng 2026 bilang bahagi ng pinaigting na kampanya laban sa sakit.
