480 total reads
Nakikiramay ang Philippine Misereor Partnership, Inc. (PMPI) sa pamilya ng nasawing bulldozer operator sa naganap na landslide sa Semirara mining pit sa Antique noong March 1, 2026.
Batay sa mga ulat, natabunan ng lupa ang operator nang bumagsak ang bahagi ng open pit.
Ayon sa PMPI, hindi ito ang unang trahedya sa operasyon ng Semirara Mining and Power Corporation, kung saan mula 2013 hanggang 2020, tinatayang 20 na ang nasawi sa sunud-sunod na aksidente sa open-pit mines ng kumpanya, kabilang ang mudslides, pagbagsak ng lupa, at pagkalason sa gas.
“These cited repeated incidents demonstrate a troubling pattern of occupational neglect that cannot simply be dismissed,” pahayag ng PMPI.
Paliwanag ng grupo, ang open-pit mining ay may malaking panganib sa kalikasan at lipunan—mula sa polusyon, pagkasira ng biodiversity, at pagkawala ng kabuhayan, hanggang sa panganib sa mga pamayanang malapit sa minahan.
Anila, ang madalas at malalang insidente ay nagpapakita ng kakulangan sa kaligtasan ng manggagawa at pananagutan ng kumpanya.
Nanawagan ang PMPI ng agaran at malayang imbestigasyon, malinaw na ulat, at suporta sa pamilya ng nasawi.
“More importantly, the repeated fatalities compel a serious checks and reassessment of continued mining operations in Semirara,” ayon sa PMPI.
Iginiit din ng grupo ang agarang pagsusuri sa compliance sa kaligtasan at epekto sa kalikasan bago ipagpatuloy ang pagmimina.
Ayon sa PMPI, ang buhay ng manggagawa at kaligtasan ng kalikasan ay dapat unahin kaysa kita ng kumpanya.
“No economic activity can justify the social and environmental costs of mining including the continued loss of workers’ lives and the degradation of the environment,” saad ng PMPI.
