366 total views
Binibigyang-diin ng mga tagapagtaguyod ng climate justice ang mahalagang tungkulin ng kababaihan sa mga bansa sa Global South, kabilang ang mga nasa Asia, Africa, Latin America, at mga pulo sa Pacific Ocean, sa gitna ng lumalalang krisis sa klima.
Ayon kay Caritas Internationalis’ Regional Jubilee Program Lead for Asia Jing Rey Henderson, bagamat kabilang ang kababaihan sa higit na naaapektuhan ng mga sakunang dulot ng pagbabago ng klima, sila rin ay mahalagang puwersa sa pagpapatatag at pagbangon ng mga pamayanan.
Ipinaliwanag ni Henderson na dahil sa umiiral na hindi pagkakapantay-pantay sa lipunan, mas mabigat ang pasaning dinaranas ng kababaihan tuwing may kalamidad.
Bukod sa paghahanap ng tubig at pagkain para sa pamilya, kadalasan din silang inaasahan na alagaan ang mga nasugatan at nawalan ng tahanan matapos ang sakuna.
“Women are not just victims of climate crises—they are catalysts for change. Their leadership, knowledge, and resilience are essential to building communities that can adapt and thrive in the face of disasters,” ayon kay Henderson.
Sa kabila nito, kinikilala ang mahalagang kaalaman ng kababaihan sa pangangalaga ng kalikasan, lalo na sa mga kanayunan at katutubong pamayanan kung saan sila ang nag-aalaga sa agrikultura, mga binhi, at biodiversity.
Isa sa mga halimbawa ng pamumuno ng kababaihan sa pangangalaga ng kalikasan ang Chipko Movement sa India, kung saan pinangangalagaan ng mga kababaihan ang mga kagubatan laban sa pagputol ng mga puno.
Iginiit ni Henderson na mahalagang isama ang kababaihan sa pagbuo ng mga polisiya at programa sa klima upang higit na mapatatag ang kakayahan ng mga komunidad na harapin ang mga hamon ng pagbabago ng klima.
“Empowering women is not optional—it is central to creating sustainable, just, and resilient communities across the Global South,” saad ni Henderson.
