12,699 total views
Maituturing na mahalagang pagkilala sa ambag ng Simbahang Pilipino sa larangan ng komunikasyon ang pagtatalaga ng tatlong obispong Pilipino bilang miyembro ng Dicastery for Communication ng Vatican.
Kabilang sa mga hinirang ni Pope Leo XIV sina Cardinal Luis Antonio Tagle, pro-prefect ng Dicastery for Evangelization; San Pablo Bishop Marcelino Antonio Maralit; at Guam Archbishop Ryan Jimenez.
Ang pagkakahirang sa tatlong Pilipinong pastol ay nagpapakita ng lumalakas na tinig ng Pilipinas sa pandaigdigang komunikasyon ng Simbahan, partikular sa malawakang ebanghelisasyon sa digital na panahon.
Si Cardinal Tagle ay kilala sa kanyang malawak na karanasan sa global evangelization at pakikipag-ugnayan sa iba’t ibang kultura, habang si Bishop Maralit ay kasalukuyang namumuno sa Office of Social Communications ng Federation of Asian Bishops’ Conferences na isang mahalagang tanggapan sa paghubog ng komunikasyon ng Simbahan sa Asya.
Samantala, si Archbishop Jimenez, na nakabase sa Agaña, Guam, ay kinikilala sa kanyang pastoral at mga adbokasiya sa komunikasyon sa Pacific region.
Ayon sa Vatican, ang Dicastery for Communication ang nangangasiwa sa kabuuang sistema ng media at komunikasyon ng Simbahan, kabilang ang Vatican News at iba pang plataporma, upang mas epektibong maipahayag ang mensahe ng Ebanghelyo sa buong daigdig.
Bukod sa tatlong Pilipino, kabilang din sa mga bagong miyembro ng dicastery ang ilang kardinal at obispo mula sa iba’t ibang kontinente, patunay sa patuloy na pagsisikap ng Simbahan na palakasin ang ugnayan at komunikasyon sa iba’t ibang kultura at bansa.
Ang pagtatalaga sa tatlong obispong Pilipino ay hindi lamang personal na pagkilala, kundi maituturing din na patunay sa mahalagang papel ng Pilipinas sa misyon ng Simbahan sa makabagong larangan ng komunikasyon.
