15,687 total reads
Inaanyayahan ng Office for the Promotion of the New Evangelization (OPNE) ang mga mananampalataya na makibahagi sa susunod na Manila Archdiocesan General Pastoral Assembly (MAGPAS) 2026 na gaganapin sa April 11 sa San Roque de Mandaluyong Parish.
Tampok sa pagtitipon ang temang “Evangelization and the Country,” na naglalayong pagnilayan ang papel ng sambayanang Kristiyano sa pagpapalaganap ng Kaharian ng Diyos sa gitna ng mga hamong moral at panlipunan sa bansa, gayundin sa lumalalang tensyon sa iba’t ibang panig ng mundo.
Ayon sa OPNE, mahalaga ang aktibong pakikibahagi ng bawat mananampalataya sa misyong ebanghelisasyon, hindi lamang sa loob ng Simbahan kundi lalo na sa lipunan kung saan higit na kinakailangan ang pananampalatayang isinasabuhay sa konkretong pagkilos.
Magsisimula ang programa sa pagpapatala ng alas-7 ng umaga, susundan ng Banal na Misa na pangungunahan ni Manila Archbishop Jose Cardinal Advincula.
Tatalakayin sa pagtitipon ang paksa ng responsableng pakikilahok ng Kristiyano sa lipunan at ang papel ng ebanghelisasyon sa larangan ng socio-political kung saan kabilang sa mga magbahagi ng panayam sina Fr. Enrico Martin Adoviso, minister ng Archdiocesan on Labor Concerns and Ministry on Socio-Political Affairs, at ang lay preacher na si Alvin Barcelona.
Patuloy na mensahe ng pagtitipon ang panawagan ng Simbahan na maging buhay na saksi ng pananampalataya at maging tagapagtaguyod ng katotohanan, katarungan, at kapayapaan sa gitna ng mga hamon ng panahon.
