16,999 total reads
Labis na ikinababahala ng social, advocacy, at development arm ng Catholic Bishops’ Conference of the Philippines ang panukalang pag-alis ng coal moratorium at paggamit ng mas mababang uri ng langis bilang tugon sa umiiral na krisis sa enerhiya.
Ayon kay Caritas Philippines President, San Carlos Bishop Gerardo Alminaza, ang mga panukalang tinalakay sa pagdinig sa Senado noong April 13 ay pansamantalang solusyon lamang na maaaring magpalala sa matagal nang suliranin ng bansa sa pagdepende sa fossil fuel.
Binigyang-diin ni Bishop Alminaza na ang ganitong sistema ng enerhiya ay naglalagay sa bansa sa panganib sa tuwing may sigalot sa ibang bahagi ng mundo, habang higit na pinapasan ng mahihirap ang epekto nito.
“When energy systems rely on these volatile sources, every international conflict quickly becomes a domestic crisis,” pahayag ni Bishop Alminaza.
Ipinaliwanag ng Caritas Philippines na hindi “neutral” na pinagkukunan ng enerhiya ang coal dahil nagdudulot ito ng polusyon sa hangin, pagkasira ng kalikasan, at lalo pang nagpapalala sa krisis sa klima.
Binanggit din ni Bishop Alminaza ang kalagayan ng mga pamayanang apektado ng coal projects, kabilang ang Atimonan sa Quezon Province at mga lugar sa Zambales, kung saan nararanasan ng mga residente ang banta sa kalusugan at kabuhayan.
Nagbabala ang obispo na ang mga tinuturing na pansamantalang hakbang ay maaaring magdulot ng pangmatagalang suliranin sa enerhiya at kapaligiran.
“True energy security cannot be built on fuels that expose the nation to price shocks and long-term social costs,” ayon kay Bishop Alminaza.
Sa halip, hinikayat ng grupo ang pamahalaan na pabilisin ang paglipat sa renewable energy tulad ng solar, wind, geothermal, at marine energy na mas ligtas, praktikal at sustainable.
Iginiit ni Bishop Alminaza na dapat unahin ang kapakanan ng mamamayan at kalikasan sa pagbuo ng mga polisiya sa enerhiya.
Nanawagan ang Caritas Philippines sa lahat ng sektor na pangalagaan ang nag-iisang tahanan at isulong ang mga solusyong makakalikasan at makatao.
“We urge our leaders to choose a different path—one rooted in justice, sustainability, and peace,” saad ng grupo.
