8,229 total reads
Inalalayan ng Caritas Manila ang mga public utility vehicle drivers at tricycle drivers na lubhang apektado ng krisis sa langis at ekonomiya.
Tiniyak ni Caritas Manila Executive Director Father Anton CT Pascual ang pamamahagi ng tulong sa mga driver upang makatugon sa kanilang pang-araw araw na pangangailangan.
Sa unang serye ng relief support, namahagi ang Caritas Manila ng P2,000 gift certificates sa 176-drivers na kasapi ng Pandacan Drivers Association
(PANDASS) at Pandacan Tricycle Drivers Association (PATODA).
Ayon kay Fr. Pascual, sa tulong ng inisyatibo ay mabibili ng mga driver ang pangunahing pangangailangan katulad ng pagkain.
“Nagpapasalamat tayo sa Panginoon at nabigyan ng plagkakataon na tayo makatulong sa ating mga drivers ng jeepney at tricycle dito sa may Pandacan sa ating patuloy na pag-aabot ng relief support sa mga direktang naapektuhan ng pagtaas ng gasolina, bunga ng digmaan na nagaganap ngayon sa Middle East, Gitnang Silangan,” bahagi ng mensahe ni Father Pascual.
Tiniyak din ng Pari ang pagpapalawig ng pamamahagi ng Gift Certificate na ngayon ay umaabot na sa limang milyong piso.
Layon ng Caritas Manila na nabigyan ng 2-libong GC ang may 2,500 na PUV drivers sa Metro Manila at iba pang bahagi ng bansa.
Labis naman ang pasasalamat nina Antonio Lazarte at Tony Mike Martinez na mga PUJ driver at Robert Tupacio at Philip Villanueva ng PATODA sa tulong na handog ng Caritas Manila at mga donors nito.
Sinabi ng mga driver na dahil sa tulong ay makapag-uwi sila sa kanilang pamilya ng dapat na pagkain.
