9,498 total reads
Naghatid ng mensahe ng pag-asa at pagkalinga si Pope Leo XIV sa kanyang pagbisita sa isang nursing home sa Saurimo, Angola, kung saan binigyang-diin ang dignidad ng matatanda at ang kahalagahan ng malasakit sa kapwa.
Sa kanyang pagbati, inilarawan ng Santo Papa ang tahanan bilang lugar ng kapayapaan at pagmamahalan.
Pinasasalamatan ng Santo Papa ang buong komunidad sa mainit at makabuluhang pagtanggap sa kanyang pagdalaw sa lugar bilang bahagi ng kanyang Apostolic Journey sa Africa.
Ikinalugod din ni Pope Leo na ang pasilidad ay tinatawag na “lar” o tahanan, na sumasalamin sa diwa ng pagiging pamilya. Hinikayat niya ang lahat na panatilihin ang ganitong kapaligiran ng pagmamalasakit at pagkakaisa.
Binigyang-diin ni Pope Leo XIV na ang presensya ni Kristo ay nananatili sa mga simpleng gawa ng pagmamahalan at pagpapatawad.
“Jesus also lives here… whenever you try to love one another and help one another as brothers and sisters,” ayon kay Pope Leo XIV, kasabay ng paalala na ang panalangin at pagkakasundo ay konkretong pagpapakita ng pananampalataya. Pinuri rin ng Santo Papa ang mga awtoridad, kawani, at mga volunteers sa kanilang malasakit sa matatanda.
“The care of the weakest is a very important sign of the quality of the social life of a nation,” giit ng Santo Papa
Dagdag pa niya, hindi lamang pangangalaga ang kailangan ng mga nakatatanda kundi pakikinig, sapagkat taglay nila ang
karunungan ng bayan.
Muling iniaalay ni Pope Leo XIV ang komunidad sa Mahal na Birheng Maria at ang mensahe ng pagpapala at pag-asa, para sa kanilang misyon sa pangangalaga sa mga kabilang sa mahihinang sektor ng lipunan.
Iginiit ng Santo Papa na ang isang lipunang tunay na makatao ay nasusukat sa paraan ng pag-aaruga at paggalang nito sa mga pinakamahihina, lalo na ang mga matatanda.
